Stockholm II

Den vesle Gneist-gjengen i Stockholm sprang nye gode løp søndagen - under det som på dårleg svensk heiter DN Galan Youth. DN Galan er jo namnet på Diamond League-stemnet i forkant - som gjekk fredagskvelden med solid innsats i alle fall av Andreas Thorkildsen i spyd. DN står for Dagens Nyheter, den tradisjonsrike svenske avisa. Youth står får ungdommar mellom 12 og 19 år.

Søndag fekk Renate Lie (J13) md seg både 80 meter og 600 meter. Begge deler har ho sprunge fortare tidlegare, men på 80 meter var det 2,1 sekundmeter motvind og 600-meteren på 1:43,40 gav uansett ein fin 3. plass. Med det kopierte ho pallplassen til Jørgen Jensen Axelsen (G18) frå 1500 meter lørdag. Søndag sprang han 800 meter like bak pers, på 2:06,35, så Jørgen er i godt slag før junior-NM til helga. (Elles noterer me oss at BFG-ar Martin Cappelen Smith - som var smålåten på 1500-meteren lørdag - endeleg kom seg under 2 minutt på 800 meter!)

Aleksander Lie (G15) måtte nøya seg med 2:09,31 på 800 meter. Det er godt bak det Aleksander er god for oss på sitt beste. Vinnartida her blei elles på sterke 1:56 - og dermed er beste svenske på 800 meter i G15 om lag jamgod med beste norske, som også har 1:56. (Og til sist i G15: Karsten Warholm frå Dimna plussa på aldersrekord-beholdninga med 300 meter utan hekkar søndag...)

Stockholm

Gneist-utøvarar er det nesten overalt. Ei fin lita handfull har denne helga funne vegen til olympiastadion i Stockholm. Neste år er det 100 år sidan den var OL-arena. Sjølv sprang eg 80 meter på grasbakken der for 23 år sidan - full fart framover mot scena etter at portane opna før Bruce Springsteen-konserten der 2. juli 1988...

I dag sprang Renate Lie (J13) 300 meter på 43,64. Med det tok ho 7. plass i F14. Det er også ny offisiell klubbrekord i øvinga (den var ledig).

Seks dagar før eitt av dei store måla denne sesongen - 5000 meter under junior-NM - så sprang Jørgen Jensen Axelsen (G18) ein solid 1500 meter. Han persa med god margin, bevega seg heilt ned på 4:04,56 og tok med det 3. plasss i 19-årsklassen. Det gir 982 poeng.

Aleksander Lie  (G15) kom seg i mål på 43,05 på 300 meter hekk, om lag halvsekundet bak bestenoteringa si. Her sette elles 96-årgangens store komet, Karsten Warholm frå Dimna, endå ein aldersrekord (den andre på nett denne distansen i år).

Strålande på Bornholm

Det var jamn og god springing gjennom heile veka på far og dotter Johansen under årets Etape Bornholm.

Tom Roger Johansen avslutta med to 6. plassar. Først blei det 38:02 på 8,5km torsdag, før han avslutta med 41:05 på 10km fredagen. Samanlagt blei det også 6. plass på Tom Roger - av totalt heile 159 deltakarar i klasse 50-59 år.

Ingrid Næss Johansen har i motsetning til papen hatt kviledagar mellom øktene, men det er ikkje løgne ferien i 3-4 kilometers-løp mandag-onsdag-fredag. Fredagen avslutta Ingrid med ein 4,2km på 17:36. Det gav 6. plass også for henne, medan ho i samandraget i Piger 12-14 år fekk ein strålande 5. plass. I denne klassen var det også mange deltakarar, totalt 74.

Hat trick

Det var ein flott sommarkveld då Norna-Salhus skipa til sesongens andre karusell på Fana Stadion onsdag. Storleiken på gjengen av Gneist-utøvarar som deltok var eit par hakk over sist onsdag, så det lakkar og lir mot ferieslutt.

Kristoffer Blücher (G12) fullførte sitt klubbrekord-hattrick då han sprang 300 meter på 43,78. Med det sletta han Marius Benserud sin ti år gamle klubbrekord med god margin (45,91) og Kristoffer har no klubbrekordane både på 100 meter, 200 meter og 300 meter i årsklassen. Det har vore ein framifrå sesong (så langt!) for Kristoffer.

Klubbrekord noterer me også (igjen) på Sondre Rinde (G13), som denne gongen fekk seg tid på 300 meter hekk (76,2cm) og sprang i mål på 47,59.

G11-utøvarane Thomas Blücher og Espen Bjørndal hadde også ein fin kveld. Begge persa på 60 meter, Thomas til 9,50 og Espen eit bittelite hakk bak, 9.53. I tillegg oppnådde Espen 8,26 i tresteg, som gir 906 tyrvingpoeng.

Endeleg tar me med at Maren Omholt (J13) gledeleg nok banedebuterte onsdagskvelden. Dermed er ho med og gjer 98-gjengen for jentene endå fyldigare. Ho prøvde seg på 100 meter (16,51) og 200 meter (34,62). Her er det mange, magne øvingar igjen å persa i, Maren!

Etape Bornholm II/III

På den danske øya Bornholm spring dei vidare. Tirsdag var Tom Roger Johansen i elden på ei 5,8 km-etappe. Tom Roger kom i mål på 26:03, som gav 7. plass. Og 7. plassar held det fram med. Onsdag var etappen 7,8 km og tida blei 32:36. Også samanlagt etter tre etappar ligg han som nr. 7 - neste naturleg nok - i klassen sin, 50-59 år.

Ingrid Næss Johansen hadde kviledag tirsdag, men var i gang igjen med ei 2,9km etappe onsdag. Den gjorde Ingrid unna på 12:10, som gav ein 6. plass. Totalt i klassen - Piger 12-14 år - ligg Ingrid på 5. plass, ikkje langt bak 4.

Etape Bornholm

Me er representert på det tradisjonsrike løpsarrangementet Etape Bornholm denne veka. Det er med far og dotter Johansen.

Tom Roger Johansen opna "Tour de Bornholm" med 8. plass i klasse 50-59 år. Han sprang 10 km på 40:22. Det er første etappe av i alt fem for han. Han spring rett og slett etappar kvar dag mandag-fredag denne veka.

Ingrid Næss Johansen slapp unna med 3,4 km. Ho spring i Piger 12-14 og plasserte seg heilt oppe på 5. plass, med tida 14:30, på 1. etappe. Ingrid har to etappar igjen, dei går onsdag og fredag.

Vidare!

Bloggen har lege i sjokk sidan fredag. Det har ikkje gått over, men det er litt betre no, i dag, ikkje minst etter den massemønstringa av markeringar overalt i Norge, som toppa seg med 150.000 menneske i Oslo og flotte 15.000 i Bergen.

Så skal me tilbake til kvardagen, til "det normale" - og me skal tilbake til idretten.

Eg lånar litt frå eit opprop som idretts- og kulturarrangør i Oslo har kome med:

"Festivaler, konserter og andre kultur- og idrettsarrangementer skal være gode arenaer for felles opplevelser, samhold og positive inntrykk i en tung tid. Sammen håper vi at våre arrangementer kan virke lettende og gode som møteplasser i den nærmeste framtida."

Onsdag er det ny Norna-karusell.


We are not afraid, we are not afraid
We shall overcome someday
Well here in my heart, I do believe
We shall overcome someday

Manuell suksess

Det var etter måten surt i veret onsdag, sjølv om det faktisk kom seg ein god del til årets første Norna-karusell på Fana Stadion på kvelden. Ein fin bukett frå Gneist fekk seg konkurransetrening i ein elles stille sommarperiode og nokre av dei viste at formen var god også. Me levde også godt med at det denne gongen måtte brukast manuell tidtaking.

Henrik Irgens Gravdal (G13) har halde fint på formen frå før ferien - for å seia det mildt. Onsdag sprang han ein sterk 400 meter, der han ikkje viste ein svak augneblink løpet gjennom. Og med 59,9 sette Henrik endå ein ny klubbrekord og også denne gongen var det Sigve Stenersen som hadde den gamle. For 28 år sidan sprang Sigve på 60,5.

Gjert Høie Sjursen (G11) lei ikkje så mykje under at det var manuell tidtaking (-) då han persa med 19 centimeter i slegge. Persen - no på 26,66 - innebar også at hans eigen klubbrekord blei betra frå kastet han fekk opp i Helsingborg tidlegare i månaden.

Anna Serine Røssland (J14) kunne sikkert tenkt seg å ha hatt godformen under større stemne tidlegare i år, men ein får vera nøgd når den kjem likevel. 5:08,5 på 1500 meter var pers-betring med om lag fem sekund. Viktigare: Med det løpet er Gneist i den situasjonen at dei vil ha to førsteårs-juniorar kvalifisert for lengre løp under junior-NM i Sigdal neste sommar. Ingrid Næss Johansen siktar alt inn mot 3000-meteren der. Det må vera ganske lenge sidan sist at Gneist var i ein slik situasjon.

Endeleg var det kjekt å sjå Andreas Iden (G16) tilbake på løpsbanen. Han slit framleis med helseproblem, som må undersøkast nøgnare, men det var meir manglande røynsle på distansen som prega 400 meter-løpet hans onsdag. 56,2 er ei habil tid, men det var stor skilnad på første 250 meter og siste 150.

Norna-Salhus

Ein kan seia særs mykje om IL Norna-Salhus - og det blir då også gjort... Men éin ting kan me ikkje seia anna enn positivt om, det er serien med karusellar som IL Norna-Salhus har arrangert på Fana Stadion sidan 1988. I kveld rullar det i gang igjen, trass i at det er midt i ferietida.

Og då er det ikkje berre enkelt. Startar/tidtakar har det vist seg å vera umuleg å få tak i til kveldens første karusell, slik at tidene på løp blir manuelle. Norna-Salhus håpar i det lengste at det dukkar opp nok funksjonærar til å hala i land stemnet elles.

I skrivande stund står det berre ein "X" på nettet når det gjeld tidspunkt for løpsøvingane. Heile karusell-oversikten finst her:

Kveldens meir detaljete tidsplan ser slik ut:

17.00   Høgde
17.30   Slegge, så diskos, så kule
18.00   Lengde
18.30   60 meter
19.00   100 meter
19.30   200 meter
19.50   400 meter
20.10   1500 meter
20.30   5000 meter

Tenk på eit tal

Ok, ok. Me får vel oppsummera Sommarkarusellen etter fire løp - og det basert på arrangøren sine offisielle resultat. Men her er altså to underlege ting som me likevel berre har med oss frå dette løpet, om me vil eller ikkje:

- arrangøren fortel om "feil vendingspunkt" på 5km. Kvifor? Og, viktigare i denne samanhengen, kor mykje feil var dette vendingspunktet?

- basert på denne feilen bestemte arrangøren at alle på 5km skulle ha eit tillegg på 12 sekund. Kvifor? Basert på kva? Alle 12 sekund?

Sportsleg er det utan tvil Jørgen Jensen Axelsen sitt sigersløp på nettopp 5km som må trekkast fram. På eiga klokke stod det 15:49 på Jørgen ved målpassering. Det ville i så fall vore første løpet under 16 minutt for han. Så flytta arrangøren han "skjønnsmessig" ned 12 sekund til 16:01. Keisamt? Ja. Rimeleg? Tvilsamt. Til samanlikning blei Selma Røssland flytta ned med 12 sekund til 34:00 på same 5km. Rettnok kan Selma få opp god fart, slik innimellom, i alle fall om det er is til premie etterpå, men at ho brukar like lang tid på "vendingsfeil-lengden" som Jørgen, ja det er særs tvilsamt...

Løpet til Jørgen plasserer han uansett på 2. plass på sommarens adelskalender. Plasseringane der etter fire løp ser elles slik ut for "kjentfolk":

MENN
5km
2. Jørgen Jensen Axelsen 16:01
9. Andreas Iden 17.12
14. Ole Martin Røssland 17:23
21. Aleksander Lie 18:10
21. Stian Norheim 18:10
28. Henrik Gravdal 18:42
53. Jostein Lie 20:17
71. Lars Arve Røssland 21:00
73. Henrik Berger Ettrup 21:03
74. Jon Iden 21:13
82. Hans-Magnus Haukøy 21:31

10km
11. Torgeir T. Hasås 36:37
32. Tom Roger Johansen 39:34

KVINNER
5km
26. Beate Jensen 23:51
47. Sanne Lillevik Christensen 25:26
80. Ann-Mari Tyssebotn Berg 27:54

10km
2. Torun Øvergaard Aarvik 41:19

Karusellkluss - sommarversjonen

I kveld har me - fire av oss i familien - sprunge Sommarkarusellen. Me betaler for å gjera det (dei fleste av oss) og me vil gjerne ha godskrive den tida me har fått. I vinter - då det var etter måten mange deltakarar - var det kluss av ulikt slag i resultatservicen rett som det var. Det var først det eine og så det andre som ikkje fungerte.

I kveld, den 18. juli, var det etter måten sommarstille i karusell-løypene, sjølv om me likevel snakkar om tresifra tal deltakarar. Og resultatlistene er komne etter måten snøgt. Det skal dei ha. Men resultata er gjennomgåande 10-12 sekund dårlegare enn det løparane sjølve har på eigne klokker. Det gjeld frå dei beste, via underteikna som definitivt sleit seg godt under 21 minutt denne gongen, trass i dei "21:00" som resultatlistene (vonleg versjon 1:0) fortel om. Og det gjeld dei lengst bak, der 7 år gamle Selma blei klokka inn av underteikna på 33:50, men har fått "34:00" i mål.

(Ole Martin hadde 17:11 på eiga klokke, fekk 17.23 på resultatlista. Og for all del: Dette er gjennomgåande og gjeld ikkje berre familien Røssland. Ronny Berthelsen frå Ask hadde om lag 20:28 på eiga klokke og har fått 20:40 på resultatlista.)

Ikkje veit eg korleis dei får det til, arrangøren i BFG, men dei får det til. Og det må dei slutta med, elles får me i alle fall springa gratis framover.

Oppdatering: Seinare har arrangøren lagt ut følgjande melding på nettsidene sine: "OBS! Alle resultater på 5KM er korrigert med +12 sekunder pga feil vendingspunkt."

Nei, dette må gjerast betre!

Årets mest framgangsrike 2011 pr. 17. juli

I går sa me eit førebels farvel til sommaren i Bergen med ein flott tur over Viddo ("Vidden" på lokalspråket). Nett heimkomne kom dei første dråpane, men noko så veldig omslag har me ikkje fått. Her er framleis 18-20 grader og berre lett regn. Fint joggever.

Etter førre "Årets mest framgangsrike"-oversikt har me hatt stemne i Byrkjelo, Strandebarm og Gøteborg. Neste gong er me godt i gang med haustsesongen. Her er oversikten:

JENTER
Løp
Silje Stenersen, Maria T. Berg, Charlotte Harris, Cathrine Harris (ny), Anna Serine Røssland

Hopp
Synne Våge Opheim, Maria Jensen, Nora Ø. Aarvik (ny), Anna Evensen, Sanne L. Christensen

Kast
Cathrine Harris, Maren Haugen Lillefosse, Charlotte Harris, Anita Norheim

GUTAR
Løp
Eirik Leikvoll (ny), Stian Norheim, Kristoffer Blücher, Herman Hovland, Sondre Rinde (ny)

Hopp
Erlend Biskopshavn, Magnus Leikvoll, Thomas Blücher, Kristoffer Blücher, Håvard Opheim

Kast
Amund H. Sjursen, Gjert H. Sjursen, Kristoffer Blücher, Magnus Leikvoll, Aleksander Lie

31 dagar...

... igjen til påmeldingsfristen til UM er det i dag. Det er ikkje så mange som er påmelde frå Gneist enno, men det kjem seg vel etter kjart. Me reknar pr. i dag med at troppen kan bli på inntil 16 utøvarar - likeleg fordelt på åtte jenter og åtte gutar. Desse er kvalifiserte så langt:

GUTAR:
- Jørgen Jensen Axelsen, G18/19 (3000m + 2000m hinder)
- Andreas Iden, G16 (800m, 3000m, ev. 1500m hinder)
- Ole Martin Røssland, G16 (3000m, 1500m hinder)
- Amund Høie Sjursen, G15 (100m, lengde, tresteg)
- Aleksander Lie, G15 (200m, 800m, 2000m, 300mh, 1500m hinder)
- Stian Norheim, G15 (2000m, 1500m hinder)
- Håvard Våge Opheim, G15 (stav)
- Magnus Leikvoll, G15 (stav)

JENTER:
- Synne Våge Opheim, J17 (stav, tresteg)
- Anne-Marte Aldal Sætre, J17 (stav)
- Marianne Benserud, J16 (100m, 200m, høgde, stav, lengde)
- Tina Therese Jenssen, J16 (stav)
- Vilde Omholt, J16 (1500m hinder, 3000m)
- Maren Risøen, J16 (lengde)
- Vilde Lund Bjørnsen, J15 (100m, 200m, lengde)
- Monika Benserud, J15 (100m, 200m, 80mh, lengde, stav, tresteg)

I UM er det altså slik at ein må vera kvalifisert i den aktuelle øvinga for å delta. I nokre få øvingar er det fri påmelding. Det gjeld hinder og langdistanse for jenter.

Det er altså ein del stemne igjen å gjera det på for dei som ikkje er kvalifiserte. Desse er nærmast kvalifiseringskrava akkurat no:

* Jørgen Jensen Axelsen, G18/19, 800m (krav: 2:03,00 - har 2:05,78)
* Ole Martin Røssland, G16, 800m (krav: 2:08,00 - har 2:09,76)
* Amund Høie Sjursen, G15, 200m (krav: 25,35 - har 25,82)
* Stian Norheim, G15, 800m (krav: 2:12,00 - har 2:13,23)
* Håvard Våge Opheim, G15, 100m (krav: 12,40 - har 12,84)
* Synne Våge Opheim, J17, høgde (krav: 1,50 - har 1,45)
* Mariane Benserud, J16, tresteg (krav: 10,00 - har 9,87)
* Tina Therese Jenssen, J16, tresteg (krav: 10,00 - har 9,66)
* Tina Therese Jenssen, J16, lengde (krav: 4,90 - har 4,84)
* Maren Risøen, J16, 100m (krav: 13,45 - har 13,88)
* Monika Benserud, J15, høgde (krav: 1,46 - har 1,45)

5000 i kveldssol

For eit par sesongar sidan skreiv Jostein Lie på dei gamle Gneist-sidene etter Hovdingleikane at Ole Martin Røssland (no G16) hadde hatt full kontroll over 600-meteren i 595 meter. I mål var han  nr. 2. Denne onsdagen i Lonevåg, Osterøy, valde han motsett taktikk.

I kveld var Ole Martin på gjennomkøyring på 5000 meter før det blir alvor under junior-NM i Kristiansand om om gode tre veker. Planen var å låna den solide ryggen til trenar Bjarte Eikanger undervegs og sjå kva det førte til.

Onsdagen var ein flott sommar-onsdag her vest og temperaturen var fin, men vinden var kanskje litt i sterkaste laget - i alle fall for den som førte. I 4650 meter førte Bjarte løpet, før Ole Martin smatt forbi og heldt unna med eit særs sterkt oppløp - til 16:02,85. Det er ny pers med godt og vel 11 sekund, så får målet bli 15-talet når ein kjem til Kristiansand.

Jørgen Jensen Axelsen (G18) var den andre Gneist-aren på Osterøy denne kvelden (det var ein god gjeng BFG-arar i tillegg). Han var hare på 800 meter og gjorde jobben som bestilt fram til 600 meter (1:30). Så avslutta han kvelden med å springa den for han sjeldne øvinga 100 meter: 13,53 i god medvind.

Autograf

Då Vilde Lund Bjørnsen (J15) sprang godt og vann bestemannspremie i Strandebarm for ei god veke sidan, opplevde ho ungar som kom bort til henne og bad om autografen. Som ein vis mann kommenterte det då: Den kan fort bli verdifull om nokre år! Søndag imponerte Vilde - igjen, denne gongen på 300 meter under Världsungdomsspelen i Gøteborg. Ho styrte finaleheatet til siger på 39,77. Det gir fantastiske 1136 tyrvingpoeng, er klubbrekord med fire sekund (Helene Aarland Holm hadde den gamle frå 2002) og er nest beste tid i aldersklassen på distansen gjennom tidene, 11 hundredel bak aldersrekorden. Bak Vilde på denne lista finst til dømes lokale heltar som Vilde Svortevik (40,43) og Isabelle Pedersen (40,62).

Sondre Rinde (G13) avslutta ei ny stor friidrettshelg for sitt vedkomande med ein fin 200 meter på 26,78 og så ei lita, men viktig forbetring i lengde: Han auka persen frå 5,08 til 5,09. Frå før delte han klubbrekorden med Per Åge Liland (sistnemnde med sitt hopp frå 1985), no har han rekorden åleine.

Til sist: Renate Lie (J13) fekk godkjende vindforhold i sitt 200 meter-heat (til og med god motvind), kom i mål på 27,36, som gir 1026 tyrvingpoeng - to poeng betre enn det flotte 1500 meter-løpet lørdag.

Då er det tivoli og ferie og fest og baluba. Og trening.

Tre topp tre (i Hordaland)

Sånn. Så var me der.

Det var eit fantastisk sommarver i Gøteborg lørdagen og fleire av Gneist-arane brukte det på framifrå vis til framifrå prestasjonar.

Eldstebror Rinde, Sondre (G13), heldt fram der han slapp under hekkeløpet fredag og sprang inn på 10.80-talet to gongar - 10,81 var best (i 1,3 i motvind) i B-finalen på 80 meter. Det er ny klubbrekord (Amund Sjursen hadde den gamle, på 11,09). Tida er tredje best i Hordaland gjennom tidene. Berre Jonas Gjesdal og Cidi Nzita har sprunge fortare på den i norsk samanheng noko ukurante distansen.

Vilde Lund Bjørnsen (J15) sprang først inn til 12,62 på 100 meter i forsøket, om ikkje før ho var vaken, så i alle fall før frukost. Så, midt på varmaste dagen, blei det bronse og 12,45. Også det er ny klubbrekord og nest beste resultatet i Hordaland gjennom tidene i årsklassen. Det gir også 1072 tyrvingpoeng.

Renate Lie (J13) sprang ein glitrande 1500 meter på 5:00,89. Det gir 1024 tyrvingpoeng og er ein solid ny klubbrekord. Den gamle hadde Ingrid Sandvoll frå 1976 - året då Jan Egil Storholt, Ivar Formo og brørne Alf og Frank Hansen tok OL-gull. Kven???! - seier dagens friidrettsheltar... Og tida til Renate er også tredje beste i Hordaland gjennom tidene.

Nesten litt uverkeleg

Ja da, det er snart slutt på andre dagen av Världsungdomsspelen her i Gøteborg - og eg er klar til å oppsummera den første. Den andre kjem etter kvart. Statistikarar er ryddige og tar ting i tur og orden. I dag blei eg godt steikt i den vest-svenske sommarsola, så huden får kvila innomhus medan statistikk blir oppdatert.

Første dag er det to namn som må nemnast, frå eit statistikkperspektiv, begge er fødde i det segnomsuste 1998: Renate Lie (J13) er på mange måtar på veg tilbake til løpsformen ho er kjent for gjennom mange sesongar. På 600 meter fekk ho 1:40,61, det er nøyaktig to tidelar bak Vilde Lund Bjørnsen sin klubbrekord. Den lever no farleg. Tida til Renate er verdt 1033 tyrvingpoeng.

Den andre som er heilt umuleg å koma utanom er Sondre Rinde (G13). Hans 60 meter hekk var veldig god i forsøket og nesten litt uverkeleg i finalen. Der blei han nr. 3 med 9,31. Han blei med det beste norske og sette ny norsk aldersrekord. Den gamle hadde 96-årgangens store forgrunnsfigur i år, Karsten Warholm frå Dimna, på 9,36. Christina-broder Vladimir Vukicevic hadde 9,48 som 13-åring og den rimeleg flinke 17-åringen Markus Loftås frå Osterøy nøydde seg med 9,70 som 13-åring. Nesten litt uverkeleg, Sondre. Og i poeng var prestasjonen verdet 1098 og er beste løpsprestasjonen i Gneist så langt i 2011.

SOMMARkarusellen

I vinter var det VINTERkarusell - med store bokstavar og i eigentleg tyding - nesten kvar gong det var løpskarusell i BFG-regi. Det er sjeldnare at det verkeleg er SOMMAR når det er "sommarkarusell". Mandag denne veka - på sjølvaste 4. juli - var det ein slik sommarleg karusell.

Her er status for kjentfolk etter tre karusell-løp i sommar:

MENN
5 km
6. Andreas Iden 17:12
16. Aleksander Lie 18:10
16. Stian Norheim 18:10
23. Henrik Gravdal 18:42
45. Jostein Lie 20:17
63. Henrik Ettrup 21:03
64. Jon Iden 21:13
69. Lars Arve Røssland 21:27
73. Hans-Magnus Haukøy 21:31

10km
9. Torgeir Hasås 36:37
28. Tom Roger Johansen 39:34

KVINNER
5km
24. Beate Jensen 24:21
41. Sanne L. Christensen 25:26
73. Ann-Mari Tyssebotn Berg 27:54

10km
2. Torun Øvergaard Aarvik 41:19

... och efter Helsingborg

Det er dagen før Världsungdomsspelen - eller VU-spelen på dei innvigdes folkemunne - startar i Gøteborg. Frå vår fortropp i sør blir det meldt at det like i etterkant av Øresundspelen i Helsingborg sist helg blei arrangert ei eiga kasttävling, med norsk dominans mellom deltakarane.

Der markerte vår fremste kastar, Gjert Høie Sjursen (G11) seg. I diskos oppnådde han 30,69. Det er Gjert sitt første kast som gir over 1000 poeng denne sesongen - nærmare bestemt 1034 - og det er betring av Gjert sin eigen klubbrekord.

I slegge blei det 26,47, som gir 929 tyrvingpoeng, og også det er klubbrekord for 11-åringar.

Innan Göteborg

Som nemnt har alt ein fortropp frå Gneist innteke Sverige. Det skjedde i idrettsleg samanheng i Helsingborg helga som var. Frå komande fredag blir denne troppen noko utvida til ein fin bukett representantar til deltaking på sjølvaste Nye Ullevi i Göteborg.

Den faste helga for Världsungdomsspelen er første helga i juli. Då er det alltid tropesommar i Sveriges nest største by, så også dette året. Men i år var rockegruppa Iron Maiden på besøk på stadion og friidrettsstemnet måtte flyttast til andre helga i juli. Då er det meldt så som så-ver, noko som får oss til å hugsa på at Göteborg jo er i Sverige sitt Vestlandet.

Sidan Göteborg er i Sverige sitt Vestlandet, så er dei heller ikkje smålåtne der og kallar altså stemnet sitt for ikkje noko mindre enn Världsungdomsspelen. Men her er deltakarar frå ganske mange land, så litt har ein som grunnlag for namnet. Det er ei stor oppleving for utøvarane å få konkurrera på denne store arenaen, som har husa fleire store internasjonale meisterskap.

Her er Gneist sin tropp:

J13:
- Renate Lie (200m, 600m, 1500m)

J14:
- Ingrid Næss Johansen (800m, 2000m)
- Anna Serine Røssland (1500mh, 2000m)

J15:
- Monika Benserud (100m, 200m, 80m hekk, lengde, tresteg)
- Vilde Lund Bjørnsen (100m, 300m, lengde)

J16:
- Marianne Benserud (100m, 200m, lengde, stav)

J17:
- Anne-Marte Aldal Sætre (Stav, 200m, 400m)

G13:
- Sondre Rinde (80m, 200m, 60m hekk, lengde)
- Casper Stenersen (1500m)

G15:
- Aleksander Lie (300m, 800m, 300m hekk)

G16:
- Andreas Iden (1500m, 3000m)

Solide prestasjonar på tre stader

Ei travel helg er over, med Gneist-utøvarar fordelt på i alle fall tre stader: Byrkjelo, Strandebarm og Helsingborg (då held eg det ope at det kan dukka opp ein ferierande Gneist-ar på start ein fjerde og ein femte stad, når resultatlistene har tikka seg ferdig inn).

Det er mykje å ropa hurra for frå denne helga, i tillegg til det etter måten fine veret.

Strandebarm:
Hans-Magnus Haukøy (G10) hadde ein fin tur til Hardanger. I høgde oppnådde han 1,20 og 965 tyrvingpoeng, i tresteg blei det heile 8,09 og 989 tyrvingpoeng. Strålande hopping blei det også lørdag på Nora Øvergaard Aarvik (J12). Ho kom seg over 1,43 - med gode forsøk også på 1,45. Det gir 992 poeng og det er berre éin cm bak klubbrekorden til Vilde Lund Bjørnsen. Kristian Schjønningsen (G12) støtte kula 8,59, medan jamaldringen Kristian Blücher denne gongen fekk godkjent vind (det vil seia heile 1,9 i mot), oppnådde 27,81 og ein solid ny klubbrekord på 200 meter. Både Stian Norheim (G15) og Anna Serine Røssland (J14) persa på høvesvis 3000 meter og 800 meter og nærmar seg neste års UM-krav på distansane. Endeleg: Vilde Lund Bjørnsen (J15) og Ole Martin Røssland (G16) fekk kvar sine bestemannspremiar for høvesvis 25,67 på 200 meter og 9:19,70 på 3000 meter.

Byrkjelo:
Her blei det nye 60 meter-persar på 13-åringane Sondre Rinde og Renate Lie. Sondre sin er no på 8,12 og Renate sin på 8,47. Så har me notert historias første kappgang-klubbrekordar i Gneist, med Cathrine Harris (J13) og Ingrid Næss Johansen (J14) sine debutar på 1000 meter kappgang. Cathrine si tid blei 6:57,94 og Ingrid si 6:43,60.

Helsingborg:
Under Öresundspelen heilt sør i Sverige har det også vore ein liten Gneist-kontingent. Amund Høie Sjursen  (G15) har meldt seg på i kampen om å klara UM-kravet i kule. Han støtte 11,07 i Sverige, knapt meteren bak kravet. På 100 meter flytta Amund den ferske persen frå Tyrving ned frå 12,10 til 12,04. Monika Benserud (J15) flytta persen sin på 80 meter hekk nedover to gongar, først til 12,46 og deretter til 12,37. Det beste resultatet gir 1018 tyrvingpoeng. Silje Stenersen (J11) passerte 4 meters-grensa i lengde; landa på 4,07. Ho gjorde dessutan eit nytt kjempeløp på 600 meter og er no nede på 1:50,24, like over halvsekundet bak Renate Lie sin to år gamle klubbrekord på distansen. Silje sitt løp er verdt 994 tyrvingpoeng.

Ut å vekke sola

Me kjem tilbake søndag kveld til i alle fall ei første oppsummering etter ei travel, men i alle fall tredelt helg; Helsingborg, Byrkjelo, Strandebarm.

No er det berre éin ting å seia, éin ting å gjera:

Opp og ut å vekke sola
så lita tid på denne jorda
Kom deg opp på himmelen
nå er det søren i meg sommeren
(Henning Kvitnes)


Strandebarm, Kvam herad: 23- 24 grader, nesten ikkje vind, regnet skal ikkje koma før i kveld. Perfekt.

Våre venner

Eg fortalde om krise i Laksevåg i vår og eg lova framhald i soga om AKS-77 for ikkje så lenge sidan. Her er framhaldet om både dei eine og dei andre.

Ryktet om friidrettsgruppa i Laksevåg IL sin død var monaleg overdrive. Laksevåg driv vidare med si gruppe med solide eldre utøvarar. Vilde Svortevik er straks klar for deltaking i U18-VM, Paula Llano hoppar høgare i stav enn nokon gong. Mykje av stridens kjerne på Laksevåg har dreidd seg om treningsfordeling og i det heile banefordeling på Nygårdsmyren - der det er kunstgras i midten for fotballspelarar og fast dekke for friidrettsfolket rundt, ein ikkje heilt heldig kombinasjon. Men det må vera betring i forholda der ute i vest; onsdag no i veka var det seriestemne på Nygårdsmyren og elles denne veka har det vore friidrettsskule på same myra; det er viktig for Laksevåg å få i gang unge utøvarar også!

Når det gjeld AKS-77, så var me altså med to utøvarar under stemnet der den 21. juni. Og alt 27. juni - etter berre seks dagar - blei resultata sendt inn på føreskrive vis. Resultatlista ligg no på friidrett.no under "Resultater", der dei skal vera. AKS-77 besto altså første prøve etter nedsablinga frå forbundet. Det er bra!

Me treng å ta vare på dei oppegåande miljøa som finst i klubbane rundt om - og er følgjeleg glade for at det no er positive nyhende både frå nord og frå vest.