Takk for det gamle

Året siste dag er her. Årskavalkadar florerer. Og her er ein til - for denne bloggen:

2. januar: Geir Sjursen blir kåra til vinnar av Veterankonkurransen 2011.

5. februar: Rapport frå Huyandai-leikane (…) på Stange. Eirik Leikvoll hoppa m.a. 1,60 i høgde

2. mars: Bloggen fortalde om kor dei viktigaste nasjonale arrangementa skulle gå i 2013. Minnar om at det blir bane-NM/UM i Sandnes, junior-NM i Overhalla, UM på Lillehammer – og hovud-NM i Tønsberg (og hovud-NM på Jessheim i 2014).

8. april var det førehandsstoff før NM/UM i terrengløp, kort løype, i Strandebarm. Bloggen tippa m.a. sølv og bronse i UM, J15, sjølv om den tok feil av rekkefølgja mellom dei to Ingrid-ane…

9. mai: Frå opningsstemnet, der Gneist hadde ei gjesterolle som arrrangør i 2012. Nyhetspoenget var at tre ulike utøvarar, i tre aldersklassar, klarte å sanka nøyaktig 909 poeng på 1500 meter: Stian Øvergaard Aarvik, Aleksander Lie og Ole Martin Røssland.

6. juni: Ein har vel etter kvart merka at bloggaren i mars månad melde overgang frå Gneist-styret til BFG-styret og denne dagen gav bloggen kvalifiseringsstatus til junior- og senior-NM for BFG-utøvarar. I 2012 var det slik at det berre var kvinnelege kvalifiserte til hovud-NM. Kva skjer i 2013?...

8. juli var det i tillegg til Anders Bjørndal sin 17-årsdag full rulle under Världsungdomsspelen i Göteborg. Heilt øvst på lista i gjennomgangen av resultat finn me Kristoffer Blücher sin strålande 200 meter i G13: 24,91 (1091 tyrvingpoeng).

12. august måtte bloggaren skryta over at han hadde «karra seg opp» til toppen av Malmangernuten i Rosendal – rettnok berre i trimklassen. For der var det både Nuten Opp og NM i motbakkeløp. Det var skodde over heile halve fylket den dagen, men på toppen av nuten var det knallblå himmel. Thorbjørn Thorsen Ludvigsen frå BFG vann NM-gull.

6. september var det ein gjennomgang på klubb-nivå etter UM på Ravnanger. Den viste seg at Gneist hadde klatra frå 30. plass i 2011 til 12. plass i 2012 på medaljestatistikken.

I oktober – til dømes den 18. – tok eg til med historietimar, rettnok (så langt) i den nære historia. UM i 2003 var temaet denne dagen, der Steffen Nerdal tok tre kast-gull for IL Gneist.

I november var det tid for «Alle tider»-gjennomgang, altså ein oversikt over kor prestasjonane i 2012 plasserte seg i Alle tider-statistikken for heile landet. 9. november handla det om Ingrid, Ingrid Helene og Anna Serine i J15. I 2013 blir 1997-gjengen i Gneist dobla…

Og i desember er det like sikkert at lagserien blir presentert. 20. desember blei gutane sitt 4. lag gjennomgått. Og det er lett å gløyma, når bestelaga til både gutane og jentene vinn Elitedivisjonen, at 4. laget til gutane faktisk vann 3. divisjon og rykka opp eit hakk. Her finst namn me håpar å sjå oftare og meir det komande året – og dei komande åra: Trym Andresen, Sindre Kampen Nesheim, Erlend Krog Solvang – og kanskje får me Tobias Damm tilbake igjen også?

Takk for det gamle!

På tur

Ein del av oss synest det er i lengste laget å måtta ta turen "heilt" til nordre Åsane og Haukås, for at ungdommane skal få konkurrert vinterstid i Leikvanghallen.

Stavhopparane dei har like godt teke turen heilt til Estland, som er noko lengre enn nordre Åsane. Søndag var brørne Eirik (G15) og Magnus Leikvoll (G17) i sving i hovudstaden, Tallin.

Begge kom seg over 3,09, som er sesongbeste. For Eirik var eit slikt hopp verdt 856 tyrvingpoeng, for Magnus 611 poeng.

Alt onsdag blir det ifølgje rapport frå Trond Leikvoll Stavhopp Grand Prix med over 100 deltakarar.

Følg med, følg med...

Og Henrik Irgens Gravdal (G15) har også vore på tur i romjula - på romjulsstemne-turné: For dagen før han deltok på BFG sitt stemne lørdag, så var Henrik Gneist-representant under Stord Idrettslag sitt endå meir tradisjonsrike romjulsstemne på Vikahaugane.

Best gjorde Henrik det i den for han sjeldne øvinga høgde, der det blei 1,44 (748 poeng). På 60 meter sprang han på 8,60 (716 poeng) og i ei anna sjeldan øving, kulestøt, fekk Henrik opp 6,71 (152 poeng - men i kast så tel til vanleg alle resultat i Gneist - det blir så få av dei i løpet av ein heil sesong...)

Romjul med BFG

Historias første romjulsstemne i Leikvanghallen var det Gneist som arrangerte i 2011. Lørdag ettermiddag var det BFG Bergen som overtok stafettpinnen. Det må ein nesten få lov til å seia at gjekk strålande.

Dette var eit reint løpsstemne, med øvingane 60 meter, 200 meter, 800 meter og 1500 meter.

Og sjølv midt i jula var det gode prestasjonar å få auge på:

Kristoffer Blücher (G14) held fram der han slapp sist sesong. Med 24,79 på 200 meter hamna han på nøyaktig 1000 tyrvingpoeng. Det er også nesten eit halvt sekund under gjeldande ute-klubbrekord på distansen, som Espen Liland og Sondre Rinde har saman. Med dette løpet er også Kristoffer kvalifisert til UM i 2014! På 60 meter sprang Kristoffer heilt ned på 7,77 (994 poeng).

Klubbrekord nr. 2, i alle fall med inne-tid, stod Vilde Lund Bjørnsen (J17) for. Ho har vore eit godt tidel nedpå 7-talet på 60 meter i yngre alder, men med 8,05 var ho 1/100 under Benedikte Liland sin ute-klubbrekord for 17-åringar. Løpet var verdt 986 poeng.

Nett det same - 986 poeng - var også Henrik Irgens Gravdal (G15) sin 1500 meter verdt. Henrik kom i mål på 4:22,00.

Sondre Rinde (G15) persa på 60 meter til 7,76 (943 poeng).

Renate Lie (J15), som hadde hangla litt i jula, var ikkje verre enn at ho md 27,26 på 200 meter plukka med seg 939 poeng.

Emil Engelsen Holm (G16) - årets mest framgangsrike i Gneist for gutar i 2012 - opna 2013-sesongen strålande. Tida 24,27 er beste innetida for 16-åringar i Norge så langt. Løpet er verdt 934 poeng.

Michelle Floor Heggeland (J14) kom i mål på 8,70 på 60 meter (878 poeng).

Anna Evensen (J13) sprang 60 meter på 8,93 (856 poeng) og 200 meter på 29,69 (844 poeng).

Håvard Rinde (G12) kom rett under 30 på 200 meter: 29,72 er verdt 819 poeng. I tillegg blei det 9,15 på 60 meter (797 poeng).

Ole Martin Røssland (G18) sprang ein grei 800 meter først, tok seg ein pause på eit kvarter og kom i mål på 4:31,26 på 1500 meter (795 poeng).

So var me i gang med innesesongen - og dermed med 2013-sesongen også.

Gutane sitt 1. lag: Best i Hordaland - vegen til dominans

Jentene til Gneist var altså best i Hordaland i 2012. Gutane var også best i Hordaland i 2012 - som dei var det i 2011. For gutane er trenden endå klarare enn for jentene med jamn, men klar, framgang - på veg til dominans i kretsen - dei siste åra:

2008: 5. plass

2009: 3. plass

2010: 2. plass

2011: 1. plass

2012: 1. plass

Det blei altså 1. plass både i 2011 og i 2012, men sigeren i 2011 var på om lag 700 poeng, medan den i 2012 var på heile 3.900 poeng! Osterøy blei nr. 2 (som i fjor), medan Norna-Salhus blei nr. 3 (bytta plass med Fana, som fall ned på fjerde).

No er me inne mot toppen av ei Gneist-bølge, ganske utvilsamt, men toppen kan jo vara ei stund - og eg vil bli overraska dersom den ikkje i alle fall varer forbi 2013. Alt no har ein utøvar kome seg over 1100 tyrvingpoeng, gjeldande for 2013-sesongen (Pål Haugen Lillefosse, stav), berre som eit forvarsel.

I gutane sin Elitedivisjon gjeld følgjande:

* 60 noteringar totalt

* 24 løp/gang

* 6 hekk

* 18 hopp

* 12 kast

Og desse Gneist-gutane plukka poeng for 1. laget i 2012:

- Jørgen Jensen Axelsen

- Kristoffer Blücher

- Fredrik Collyer

- Henrik Irgens Gravdal

- Hans-Magnus Haukøy

- Emil Engelsen Holm

- Andreas Iden

- Eirik Leikvoll

- Pål Haugen Lillefosse

- Håvard Rinde

- Sondre Rinde

- Ole Martin Røssland

- Kristia Schjønningsen

- Amund Høie Sjursen

- Gjert Høie Sjursen

- Erlend Krog Solvang

- Stian Øvergaard Aarvik

Jentene sitt 1. lag: Best i Hordaland i 2012

Då nærmar me oss avslutninga av lagserie-gjennomgangen for 2012. Jentene sitt førstelag gjorde come back på øvste trinnet i 2012. Det blei siger i 2010, men 2. plass i 2011. Det var noko overraskande at jentene gjekk heilt til topps i år - den totale poengsummen var noko lågare enn året før, men dette handlar naturlegvis også om dei andre klubbane si utvikling: Norna-Salhus gjekk eit par hakk ned, medan det er Bergens Turnforening som har mest vind i seila. Førstelaget til Bergens TF gjekk opp frå 4. til 2. plassen og hamna knepne 71 poeng bak Gneist til slutt. Norna-Salhus på tredje var ikkje veldig langt bak der igjen.

Slik har det gått for Gneist-jentene dei siste fem åra:

2008: 3. plass
2009: 3. plass
2010: 1. plass
2011: 2. plass
2012: 1. plass

Brukbart, det.

I jentene sin Elitedivisjon er det følgjande som gjeld:
* 50 noteringar totalt
* 20 løp/gang
* 5 hekk
* 15 hopp
* 10 kast

Og desse Gneist-jentene plukka poeng for 1. laget i 2012:

- Marianne Benserud
- Monika Benserud
- Sara Tyssebotn Berg
- Hannah Sørbø Berge
- Vilde Lund Bjørnsen
- Victoria Bruun
- Sanne Lillevik Christensen
- Sunniva Eikestad
- Anna Evensen
- Cathrine Harris
- Charlotte Harris
- Michelle Floor Heggeland
- Sara Holten
- Pia Hovland
- Renate Lie
- Maren Haugen Lillefosse
- Silje Stenersen
- Nora Øvergaard Aarvik

Gutane sitt 2. lag: nr. 1 i 1. divisjon

Eitt av (naturlegvis!) fleire spørsmål før 2013-sesongen er: Kan Gneist-gutane sitt 2. lag klara å halda plassen i Eliten denne gongen? Det har vore i eit heist-tilvære mellom Eliten og 1. divisjon. (Det blei 7. plass i Eliten i 2011.) Men i 2012 blei sigeren i 1. divisjon så solid at det vil kunna lukta på "fast plass" i Eliten også i 2014, med ytterlagere framgang. 

I gutane sin 1. divisjon gjeld følgjande:

* 50 noteringar totalt

* 20 løp/gang

* 5 hekk

* 15 hopp

* 10 kast

Følgjande Gneist-gutar plukka poeng for 2. laget i 2012:

- Jørgen Jensen Axelsen

- Anders Bjørndal

- Espen Bjørndal

- Kristoffer Blücher

- Herman Ellingsen

- Hans-Magnus Haukøy

- Emil Engelsen Holm

- Andreas Iden

- Eirik Leikvoll

- Magnus Leikvoll

- Aleksander Lie

- Pål Haugen Lillefosse

- Stian Norheim

- Håvard Rinde

- Sondre Rinde

- Ole Martin Røssland

- Kristian Schjønningsen

- Amund Høie Sjursen

- Gjert Høie Sjursen

- Stian Øvergaard Aarvik

Jentene sitt 2. lag: nr. 4 i 1. divisjon

Det kan jo ikkje gå på fram over heile fjøla. Jentene sitt 2. lag var i Elitedivisjonen i 2011 og skulle såleis kunna vera i nærleiken av ny-opprykk i år. Det var laget for så vidt, det var ikkje veldig langt opp til Stord sitt 1. lag, som tok den andre opprykksplassen. Fana sitt 2. lag vann 1. divisjon, med fleire  jenter på laget som i 2013 vil representera Gneist. Eg spår at det er gode sjansar for opprykk til Eliten for 2. laget komande sesong.

Men igjen: 25 % av øvingane i divisjonen skal vera kast-øvingar. Studér namna nedst og sjå kor mange av dei som ein tenker på som kastarar...

Både 3. laget (omtalt hin dagen) og 2. laget var altså i 1. divisjon i 2012 - og i 1. divisjonen er det følgjande som gjeld:

* 40 noteringar totalt
* 15 løp/gang
* 3 hekk
* 12 hopp
* 10 kast

* Og desse Gneist-jentene plukka poeng for 2. laget i 2012:

- Marianne Benserud
- Monika Benserud
- Sara Tyssebotn Berg
- Anna Evensen
- Cathrine Harris
- Charlotte Harris
- Michelle Floor Heggeland
- Ingrid Næss Johansen
- Maren Haugen Lillefosse
- Ingrid Helene Nyhus
- Renate Lie
- Maren Risøen
- Anna Serine Røssland
- Silje Stenersen
- Nora Øvergaard Aarvik

Glædelig jul!

Gutane sitt 3. lag: nr. 3 i 1. divisjon

Det var jammen bra eg slo det fast i går, at alle laga så langt i gjennomgangen hadde hatt plasseringsframgang i Lagserien frå 2011 til 2012. For det stoppar i dag. Men berre så vidt. For 3. laget til gutane tangerer plasseringa frå i fjor. Igjen: 3. laget til gutane blei nr. 3 i 1. divisjon. Ikkje berre det; 3. laget var ikkje veldig langt ifrå å rykka opp i Eliten. I så fall ville altså Gneist-gutane hatt så stor breidde i toppen at dei tre beste laga fanst i Eliten, der det til saman er berre åtte lag. Igjen: Sterke saker.

I gutane sin 1. divisjon gjeld følgjande:

* 50 noteringar totalt
* 20 løp/gang
* 5 hekk
* 15 hopp
* 10 kast

Og følgjande Gneist-gutar var med på å plukka poeng for 3. laget i 2012:

- Jørgen Jensen Axelsen
- Anders Bjørndal
- Thomas Blücher
- Erlend Borsholm
- Fredrik Collyer
- Herman Ellingsen
- Filip Lorentzen Gram-Knutsen
- Hans-Magnus Haukøy
- Emil Engelsen Holm
- Herman Hovland
- Ivan Høie
- Eirik Henriksen Karstad
- Olve Legreid
- Eirik Leikvoll
- Alekansander Lie
- Pål Haugen Lillefosse
- Stian Norheim
- Håvard Våge Opheim
- Håvard Rinde
- Sondre Rinde
- Ole Martin Røssland
- Kristian Schjønningsen
- Gjert Høie Sjursen
- Stian Øvergaard Aarvik

Jentene sitt 3. lag: nr. 8 i 1. divisjon

Så langt har me rapportert om 4. laga til Gneist i årets lagserie i Hordaland. Og merk følgjande:

- 4. laget til gutane plasserte seg fire plassar høgare i 2012 enn i 2011.
- 4. laget til jentene stabiliserte seg i divisjonen over etter opprykk i 2011.

Og 3. laget til jentene: Dei rykka opp frå 2. divisjon i 2011 (2. plass) og redda plassen i den nye divisjon (1. divisjon) i 2012. 8. plassen, som er siste plass før nedrykk, var sikker nok: God margin ned mot nedrykk, men også eit stykke opp. Poenget: Så langt har alle dei tre laga som er presentert hatt god framgang frå året før!

I jentene sin 1. divisjon gjeld følgjande:

* 40 noteringar totalt
* 15 løp/gang
* 3 hekk
* 12 hopp
* 10 kast

Og følgjande Gneist-jenter plukka poeng for 3. laget i 2012:

- Marianne Benserud
- Monika Benserud
- Maria Josefine Berg
- Sara Tyssebotn Berg
- Anna Evensen
- Cathrine Haris
- Charlotte Harris
- Michelle Floor Heggeland
- Malin Henrii
- Sara Holten
- Tina Therese Jenssen
- Ingrid Næss Johansen
- Ida Karoline Michelsen
- Amalie Ellingsen Nyheim
- Maren Risøen
- Anna Serine Røssland
- Nora Øvergaard Aarvik

Gutane sitt 4. lag: nr. 1 i 3. divisjon

Alle dei fire gutelaga til Gneist gjorde det veldig bra i årets lagserie. Dei tre øvste laga - som me kjem tilbake til med tid og stunder - er alle heilt i det øvste sjiktet. Så har det vore eit lite hopp til lag nr. 4, som i 2012 var plassert på nivå 4 (altså 3. divisjon), men med siger i denne divisjonen blei det altså opprykk til 2. divisjon (eller nivå 3) i 2013.

I gutane sin 3. divisjon er det følgjande noteringar som tel med i lagserien:

* 30 noteringar totalt
* 12 løp/hekk/gang
* 10 hopp
* 8 kast

Her er det etter måten mange kast og etter måten få løp som tel med, noko som for tida ikkje er nokon fordel for Gneist. Likevel blei det altså siger i 3. divisjon, i hard kamp med våre gamle venner i Fana sitt 4. lag - begge desse laga rykka altså opp.

Følgjande Gneist-gutar plukka poeng for 4. laget (og kan - dersom ein ønskjer det - titulera seg som divisjonsmeistrar i 3. divisjon i 2012):

- Trym Andresen
- Thomas Blücher
- Tobias Damm
- Henrik Irgens Gravdal
- Hans-Magnus Haukøy
- Herman Hovland
- Eirik Henriksen Karstad
- Eirik Leikvoll
- Aleksander Lie
- Pål Haugen Lillefosse
- Johannes Møllerup
- Sindre Kampen Nesheim
- Håvard Våge Opheim
- Håvard Rinde
- André Jensen Ryland
- Ole Martin Røssland
- Kristian Schjønningsen
- Amund Høie Sjursen
- Erlend Krog Solvang

Jentene sitt 4. lag: nr. 5 i 2. divisjon

Sjå der - då er me i gang med den årvisse gjennomgangen av Gneist-laga i Lagserien i Hordaland. Gneist har fire lag for jenter og fire for gutar - og me startar (som vanleg) bakifrå med 4. laget for jentene.

Men stopp litt, kva var no dette med "Lagserien" igjen? Der trur eg me må gjera det enkelt for oss sjølve ved å sitera gneist.no - som fortel om dette på framifrå vis:

"Friidrett er - med eit par-tre småunntak - ein individuell idrett. Når så sesongen er slutt gjer ein den likevel om med eit lagfokus. Me snakkar i denne samaheng om Hordaland Friidrettskrets. For 10- 19 år skjer dette slik:

Dei beste resultata etter Tyrvingtabellen for kvar enkelt utøvar gjeld. Det vil altså seia at ein utøvar berre kan ha eitt resultat med i ei enkeltøving, men kan vera representert med ei rekkje ulike øvingar.

Kvar klubb kan melda på fleire lag i serien. Dei individuelle resultata blir omgjort til del av eit lag. Ein har på førehand bestemt kor mange resultat som tel i kvar øvingsgrein (løp/hekk/hopp/kast) i kvar divisjon. Dei enkelte laga har si plassering i divisjonar basert på fjorårsresultat.

Fristen for innsending av serieresultat er 20. oktober. Så tar det ein del veker deretter før resultata blir offentlegjort.

Elitedivisjonen har åtte lag, 1. til 4. divisjon har ti lag. (Resten, under der, er i 5. divisjon.)

Godt sagt, det!

Så, til jentene sitt 4. lag. Dei blei nr 2 i 3. divisjon i 2011 og var såleis nyopprykka til 2. divisjon i år. Ein 5. plass inneber ein plass midt i denne divisjonen (nivå 3), så det må vera strålande.

I 2. divisjon tel følgjande resultat med: 30 noteringar totalt, 12 løp/gang, 2 hekk, 10 hopp og 6 kast.

Følgjande Gneist-utøvarar plukka poeng for 4. laget for jenter i 2012:

- Maria Josefine Berg
- Hannah Sørbø Berge
- Sanne Lillevik Christensen
- Sunniva Eikestad
- Cathrine Harris
- Charlotte Harris
- Sara Holten
- Tina Therese Jenssen
- Ingrid Næss Johansen
- Maren Haugen Lillefosse
- Gina Birkeland Milde
- Amalie Ellingsen Nyheim
- Emma Schrøder
- Silje Stenersen
- Mille Stenhaug
- Pernille Espetvedt Wollersen

Stian susar vidare (Vinterkarusellen-3)

Stian Øvergaard Aarvik held fram med framifrå form. Han starta oppturen under UM på Askøy og har berre blitt betre og betre. Sist sprang han ein strålande 10 km på Vinterkarusellen, denne gongen hadde han eit knallhardt oppgjer med kompis Lars Lunde frå Stord og kom i mål på fabelaktige 16.00 (sjølv om 15-talet hadde vore endå kjekkare).

Her er oversikten etter 2012-løpa av vinterens karusell - sett med heilt subjektive auge:

5 KM KVINNER
Her vann Silje Stenersen heile løpet mandag. Ho kom i mål på 19.37, som vel er nest-beste 5-kilometeren hennar. Her er topp 10 etter tre løp:

1. Silje Stenersen 19.37
2. Thyra Hevrøy 20.21
3. Linn Seliussen 20.29
4. Tuva Straume 22.27
5. Sanne L. Christensen 23.38
6. Pernille Hordnes Sørås 24.06
7. Marlen Eide Røssland 24.32
8. Anne-Marte Aldal Sætre 24.37
9. Sara Tyssebotn Berg 25.07
10. Margrethe Irgens Gravdal 26.15

5 KM MENN
Utanom Stian sitt solide løp, så noterer me flott framgang også på Thomas Blücher (igjen), denne gongen med over minuttet, ned til 19.40.

1. Stian Øvergaard Aarvik 16.00
2. Bjarte Eikanger 16.36
3. Henrik Irgens Gravdal 16.56
4. Jørgen Møklebust Austvik 17.02
5. Andreas Iden 17.07
6. Jens Larsen Åstveit 17.59
7. Thomas Blücher 19.40
8. André Seliussen 19.51
8. Hans-Magnus Haukøy 19.51
10. Inge Haukøy 19.54

10 KM KVINNER
På denne lista hadde me berre vinnaren frå sist løp, Torun Øvergaard Aarvik, inne før mandagens karusell. Dermed blei det ei firedobling etter dette løpet. Både Linn Seliussen og mor og dotter Røssland, Marlen og Anna Serine er no inne på mil-lista:

1. Torun Øvergaard Aarvik 41.51
2. Linn Seliussen 46.13
3. Anna Serine Røssland 48.07
4. Marlen Eide Røssland 49.24

10 KM MENN
Her er det endeleg blitt ti utøvarar - sjølv om tida til Erlend Gjerdevik Sørveit er stipulert - han fekk aldri registrert noko tid i løp 2. Den offisielle lista frå siste løpet inneheld i skrivande stund også ein viktig feil: Dei ni første på lista er 5km-løparar, slik at først nr. 10 på lista inneheld namnet på vinnaren mandag. Jo da.  Einaste nye på lista er ungguten André Seliussen:

1. Stian Øvergaard Aarvik 33.56
2. Bjarte Eikanger 33.57
3. Jørgen Møklebust Austvik 35.15
4. Ole Martin Røssland 35.16
5. Andreas Iden 36.19
6. Erlend Gjerdevik Sørtveit 36.20
7. Morten Seliussen 37.38
8. Stian Norheim 39.51
9. Jens Larsen Åstveit 40.36
10. André Seliussen 46.13

Dobbeltsiger!

Gneist dominerer den lokale friidretten! At gutelaget skulle gå til topps i årets lagserie, det var inga bombe. Gutane har betra seg frå 2011 til 2012, ganske klart, og dei vann også i fjor. Sigeren for gutane blei forsvart med glans.

Som Stein Fossen skriv det:

"Med nesten magiske 59.981 poeng på de 60 resultatene var Gneist i en egen klasse i kretsserien for gutter." 

Verken meir eller mindre; i ein eigen klasse.

Sigeren var på nesten 4.000 poeng til lag nr. 2, Osterøy.

1. divisjonslaget til gutane (2. laget) vann også heilt suverent sin divisjon, slik at - som tidlegare spådd om - Gneist vil ha to lag i Eliten for gutar i 2012.

Det var noko meir overraskande at jentene vende tilbake heilt på toppen i 2012 - etter eitt års fråver. Men medan sigersmarginen for gutane var på nesten 4000 poeng, så var den på berre 71 poeng for jentene - framfor toar Bergens Turn.

Detaljane får me ta etter kvart, men denne karamellen får me suga på gjennom jula!

Full oversikt finst her.

Sensur i/av Drammen

Det er rolege tider i friidrettsverda. Det hindrar ikkje eit stort engasjement når bloggen fortel at Gneist-utøvarar er sensurerte frå resultatlistene frå inne-UM i Drammenshallen i 2004.

Det som ikkje er blitt fortalt, er kven som sensurerer. Etter nøye granskingar viser det seg at det faktisk er bloggaren som sensurer - ingen andre.

Dette er naturlegvis ganske ufint. Det har ingenting med Gneist å gjera. Det har heller ingenting med Drammen å gjera - eg er mellom dei (få?) som alltid har hatt eit særs godt forhold til hovudstaden i Buskerud. Det har kanskje å gjera med at det innimellom går i surr.

Sjølvsagt er eg skuffa over at ingen spør meg kva "ekstrem-intervall" er for noko - jamfør gårsdagens blogg. Men det er slikt eg får leva med.

Sensur er ikkje bra.

Sensuren er no oppheva. Dette er Gneist-resultata frå inne-UM i Drammen i 2004:

- Espen Liland nr. 6 på 100m, nr. 8 på 60m, nr. 9 i lengde (G15)

- Mats Benserud nr. 5 på 800m (G16)

- Håvard Hasås nr. 1 på 800m, utslegen i forsøket på 100m (G17)

- Morten Benserud nr. 1 på 60m hekk (G18/19)

- Anne Dolvik utslegen i semifinalen på 60m og i  forsøket på 100m (J16)

- Sandra Tennøy nr. 1 i lengde og nr. 3 i høgde (J16)

- Hilde Hovlandsdal nr. 1 i høgde og nr. 6 på 60m hekk (J17)

- Benedikte Liland nr. 1 i lengde og tresteg, nr. 2 i kule og nr. 4 på 60m og 60m hekk (J17)

- Helene Bergås nr. 1 på 800m (J17)


Det var det. No skal eg sensurera vidare (eksamenssensur).

67 år - og like blid

Sjå der, der rakk eg det så vidt. Det er i skrivande stund framleis 16. desember og dermed er det framleis på sin plass (i ein halvtime til) å seia "Gratulerer med dagen!" til Idrettslaget Gneist, som har sin 67-årsdag den 16. desember.

No er det langt ifrå nokon pensjonist som finst i IL Gneist - her er det vitalitet over heile linja. Me fokuserer naturleg på friidretten her i denne bloggen, men det er no ein og annan som sparkar ball, som kastar ball og som spring i skogen med kart og kompass og slikt også - for å nemna noko.

Underteikna hadde ekstrem-intervall søndag og var forbi anlegget på Liland heile to gongar. Det ser fint ut, sjølv om bane og hall på Sandsli i dag er meir sentralt enn det gamle Gneist-sentrum på Liland. No ligg det føre planar om ny veg tvers over fotballbanane på Liland, så i så fall må både banar og klubbhus (?) lokaliserast på ny tomt.

Til sist i dag: Eg held "historietime" slik innimellom. Litt innspel får eg, litt veit eg sjølv, men det aller meste er basert på dei resultatlistene som finst elektronisk. Mykje tyder på at det er opptil fleire feil i fasiten her. Håvard Hasås melder at det faktisk var Gneist-utøvarar i inne-UM i Drammen i 2004 (sjå blogginnlegg 21. november). På dei resultatlistene eg har funne, så er - så langt eg kan sjå - i så fall Gneist-utøvarane sensurerte bort. Ikkje bra.

Historietime: UM 2005

Som tidlegare annonsert: Under Ungdomsmeisterskapet i Moss heilt i starten av september 2005 sette fire Gneist-gutar meisterskapsrekord på 1000 meter stafett (gutar 15/16). Det er ein meisterskapsrekord som, sju år seinare, framleis står. Kvaretetten Erik Hovlandsdal, Kristoffer Grindedal Janson, Espen Liland og Marius Benserud sprang i mål på 2:02,21.

Alle fire var 16 år i 2005. Gneist hadde ingen utøvarar med i G15. I G16 blei det eitt gull til, det gjekk til Marius Benserud på 300 meter hekk (her var han 0,7 sekund framfor nr. 2). Kristoffer Grindedal Janson fekk med seg ein bronse på 800 meter (tid: 1:59,18).

Mats Benserud var einsleg svale i G17. Han blei nr. 8 på 400 meter (53,89).

I G18/19 vaks Andreas Eeg ut av Steffen Nerdal sin skugge og vann gull i diskos og sølv i slegge.

Håvard Hasås sin beste plassering i 2005 var 4. plassen på 400 meter (52,50). Tredje Gneist-deltakar i denne årsklassen var Jonathan Haugland, som fekk med seg ein 7. plass i finalen på 100 meter.

Ingvild Mundal Andersen var representanten i J15. Beste gjekk det i stav, der Ingvild vann gull med 2,65.

Det var ingen Gneist-jenter med i G16, medan Sandra Tennøy henta med seg sølv (tresteg) og bronse (i høgde) i J17. Anne Dolvik blei nr. 8 i 100 meter-finalen.

I eldste jenteklasse (J18/19) var Benedikte Liland og Hilde Hovlandsdal med. Benedikte vann bronse i kule (11,21) og blei nr. 6 i lengde, medan Hilde blei nr. 10 i lengde.

Det skulle gi ein fasit - om eg har vore vaken i teljinga - på 4 gull, 3 sølv og 3 bronse. Brukbart, det.

Høgare opp

BFG skal jo framleis ha stemne i 2012 - det skjer 29. desember i Leikvanghallen, men årets siste stemne i regi av Gneist gjekk av stabelen i Høiehallen søndag. Stav var hovudøvinga, medan det også blei nokre kulestøt i tillegg.

Igjen var det Pål Haugen Lillefosse (G12) som stal overskriftene. Han auka rekordnoteringa si med éin centimeter, til 3,22 - heile 1105 tyrvingpoeng!

Betring av eigen klubbrekord blei det også på Marianne Benserud (J18), som flytta sesongbeste (og rekorden) opp med to centimeter - til 3,02 (888 poeng).

Mest solid sesongbetring stod Eirik Leikvoll (G15) for - her var betringa på 11 centimeter, opp til 3,02 (også på han) - 832 poeng.

3,02 blei det like så godt også på Magnus Leikvoll (G17) - 562 poeng.

Så vidt eg har registrert, så debuterte Sanne Myrmel (J14) i stav denne søndagen. Det gjorde ho med eit hopp på 1,92 (520 poeng).

I kule er - som vanleg - Gneist-utøvarane noko meir smålåtne, men kjekt at det kjem nokre kast-resultat alt no, det er det jo: Pål støtte 7,40 (667 poeng), Magnus 11,07 (622 poeng), Sanne 6,52 (616 poeng) og Eirik 7,75 (277 poeng).

PU - årgang II

Det aller første heile året med ei PU-gruppe i Gneist Friidrett er over. Me hadde vår siste trening for året lørdag 1. desember og ein liten bukett var med på Gneist sin grautfest fredag kveld (sjå bildet nedanfor). Neste år håpar me på mange fleire med her!

Me debuterte med stemnedeltaking på Pingvinlekene i februar. Seinare blei det to karusell-stafettar under Sommerkarusellen til Gneist og så deltaking på Gneistspelen i august. No er treninga i full gang før Pingvinlekene 9. februar 2013.

(Foto: Arve Rinde - henta frå gneist.no)

Me har stadig auka repertoaret vårt. Det starta med 60 meter og lengde under Pingvinlekene, så blei det liten ball i tillegg under Gneistspelen og no blir det kule (mjuk) under vinterens pingvinleikar.

Totalt 25 utøvarar har vore innom gruppa vår sidan starten 24. september 2011. 19 utøvarar er å rekna som aktive akkurat no. Suveren innsats har det vore frå dei gode hjelparane Vilde, Andreas, Anna Serine og Ole Martin!

Statistikk:
- Beste tida i gruppa på 40 meter er 11,52.
- Beste tida på 60 meter er 13,33.
- Beste lengdehoppet er på 3,07.
- Beste kastet med liten ball er på 19,50.

Hausten 2011 var det Sofie som hadde flest trenings-frammøte, våren 2012 var det Heine og Fredrik og hausten 2012 var det jammen Fredrik igjen som var ivirigast med treningsframmøte.

12. januar 2013 er me i gang med årgang III.

... Og... Årets mest framgangsrike i Gneist

Gneist Friidrett er ganske svært blitt. Det viste fredagskveldens grautfest tydeleg nok. Lokala på Ytrebygda skole er no i ferd med å bli sprengt. Rett og slett.

Det var som vanleg ein fin seanse det kvikke og oppegåande Gneist-styret hadde stelt i stand - med mange faste postar.

Ein av dei faste postane no etter kvart er utdelinga av prisen for "Årets mest framgangsrike" utøvar. Det er ein tradisjon innstifta i 2010 - og der kandidatar i alle fall uformelt er blitt nominert via denne bloggen.

I år blei det Emil Engelsen Holm (dessverre fråverande under grautfesten) og Pia Hovland som blei kåra.

Det er ein viktig statutt at utmerkinga skal gå til utøvarar utanfor 1000 poengs-klubben. Prisar kan ikkje berre vera til for prisane si skuld alltid. Her handlar det om å motivera dei nest-beste og visa at ein set pris på den framgangen desse har arbeidd fram.

Gratulerer til Pia og Emil!

Og her er lista over prisvinnarane sidan 2010:

2010: Vilde Omholt og Stian Norheim
2011: Silje Stenersen og Eirik Leikvoll
2012: Pia Hovland og Emil Engelsen Holm

Og utpå nyåret kjem vel bloggen i gang med søkelyset på "Årets mest framgangsrike 2013", vil eg tru.

Årets mest framgangsrike i BFG - 2012

Gneist innførte "Årets mest framgangsrike" under Grautfesten i 2010. No har også BFG innført denne prisen og før det ekstraordinære årsmøtet i klubben onsdag kveld fekk Amund Høie Sjursen det synlege beviset på at han var den mest framgangsrike mannlege utøvaren i klubben i 2012 - med god margin.

Vurderinga er gjort etter seriepoeng-tabellen og endringar mellom 2011 og 2012. Her hadde Amund desidert beste enkelt-forbetringa i lengde. I utesesongen i 2011 hoppa Amund 5,57 i lengde, eitt år seinare oppnådde han 6,71. I tillegg hadde han fjerde, femte og sjette beste forbetringa i øvingane 100 meter, høgde og tresteg.

Sara Berrefjord har enno ikkje fått si utmerking heilt konkret, men det blir vel ordna med tid og stunder. Sara toppar lista heilt åleine på jente-/kvinnesida, med både den beste og den nest-beste forbetringa. Best forbetring hadde Sara på 100 meter, med 200 meter marginalt bak der. 

På 100 meter sprang Sara på 13,37 i 2011 og på 12,92 i 2012. På 200 meter blei det nøyaktig eitt sekunds forbetring; frå 27,49 til 26,49.

BFG Bergen - nesten

Då har eit ekstraordinært årsmøte i BFG - samrøystes - bestemt å søka Hordaland Idrettskrets om å få endra namn på klubben frå dagens Friidrettsklubben BFG Fana til BFG Bergen Friidrettsklubb.

Sagt på éin måte: Klubben skiftar namn frå BFG til BFG: Det er eigennamnet "BFG" som er det aller viktigaste internt i klubben - og det kjem det til å halda fram med å vera.

Sagt på ein annan måte: Me oppgraderer klubbnamnet til å markera der ute, i det ganske land, at me er ein klubb frå byen Bergen.

Då BFG Fana blei stifta i 1987 var framleis heile det området som dei opphavlege moderklubbane soknar til ein del av Fana bydel. Men i 1990 blei "Ytrebygda" bydel etablert, som ein likeverdig bydel til Fana.

IL Gneist soknar til Ytrebygda bydel, Bjarg og Fana til Fana bydel. For ungdommar som har vakse opp etter 1990 og for oss tilflyttarar som kom til opptil fleire år etter denne endringa, ja så er det eit viktig stykke historie som har skjedd sidan BFG Fana blei oppretta i Fana bydel.

Men byen vår er Bergen. Og me soknar til byen Bergen si storstove innan friidrett, Fana Stadion.

No gjenstår enno siste ord frå Hordaland Idrettskrets, men håpet er at BFG kan feira nyttår med nytt (til-)namn.

Historietime: Hovud-NM 2004

Ein liten bukett BFG-utøvarar deltok i senior-NM i friidrett i Florø tidleg i august 2004. Best av alle gjorde Kirsten Melkevik Otterbu det, med sølv på 5000 meter. Gullet gjekk til Susanne Wigene - to år før ho vann sølv på den doble distansen, og bronsen var det Kokstad-busette Brit-Helen Simmenes som tok seg av.

Den andre medaljen til BFG i meisterskapet var det Merete Knudsen som tok, då ho fekk seg ein bronse i spyd. Her var det i tillegg ganske kort veg opp til både sølv og gull.

Johan Sørstrønen, dagens sprint-trenar i BFG, blei nr. 6 i forsøket på 100 meter med 11,37, men Johan tok 6. plass i spyd med 50,61. Her var det Andreas Thorkildsen som vann og dagens sportssjef, Ronny Nilsen, som tok sølv.

Benedikte Liland blei nr. 5 i tresteg og nr. 9 i lengde (og nr. 6 i forsøket på 100 meter).

Morten Benserud fekk det ikkje heilt til i finalen på 400 meter hekk, der han blei nr. 6, etter tredjeplass i forsøket på same distansen.

Eirik Karstensen blei nr. 7 i høgde (1,95), Hilde Hovlandsdal nr. 8 i høgde for kvinner (1,65) og Iren Vevatne Isaksen blei nr. 8 i forsøket på 100 meter.

Halvmaraton som skaper forventningar

Første luka i adventskalenderen blei opna lørdag, i fint vinterver. Og trass i vinterveret så inneheldt første luka i BFG-kalenderen strålande halvmaratonløp og medfølgjande forventningar til distansegjengen. Og søndag kveld kom endeleg offisiell resultatliste også.

Andreas Iden (framleis G17) sprang sin andre halvmaraton, eitt år etter debuten. Og denne gongen gjekk det aldeles strålande. Andreas vann heile Maratonkarusellen over halvmaraton med 1:15.42, ei persforbetring på sju minutt!

Persforbetring blei det også på Ole Martin Røssland (G17), som blei nr. 4 på lørdag. Ole Martin persa med "berre" fire minutt, til 1:16.47.

Men det stoppa ikkje der: Jørgen Austvik pynta på si bestetid med godt over minuttet, til 1:17.59. Erlend Gjerdevik Sørtveit debuterte på distansen på 1:20.10 og debut blei det også på Stian Norheim (G16) med 1:26.06.

Til desse karane er det lov til å knytta forventningar framfor ny sesong. Her lokkar senior-NM- krav (og andre krav) og her ventar me, ikkje minst, på utøvarar som bryter nye barrierar på sentrale distansar.

Eg nemner ikkje meir no. Men seinare.

2 år

Det har nett i dag gått to heile år sidan denne bloggen såg dagens lys. Dette er det 613. publiserte blogg-innlegget.

Første året blei det skrive 288, det andre er det blitt 325. Dermed er det berre feriedagar og litt til som er unna eitt innlegg om dagen...

Om dette er bra eller ikkje bra, det kan jo drøftast - og det kjem no nett an på kven ein drøftar det med.

Første året var bloggen oppe i 30 innlegg på ein månad éin gong. I det andre året blei det 31 innlegg tre månader (mai, september og november) og i tillegg 30 innlegg tre månader (mars, juni og august).


I samband med 2-årsdagen har me vore så heldige å få eit lite intervju med Bloggaren:

- Kvifor driv du og bloggar så veldig?

- Vel, det er eit spørsmål eg både er glad for å få og ikkje glad for å få.

- Kan du presisera?

- Nei.

- Og kva er det kjekkaste blogg-innlegget du har skrive?

- Det har eg ikkje skrive enno.

- No blei eg nyfiken; korleis vil det koma til å sjå ut?

- Det finst der inne i hovudet ein stad.

- Så oppskrifta på det perfekte innlegget, det er?

- Det må vera eit innlegg som på underfundig vis knyter saman ein splitter ny Bruce Springsteen-song med svære prestasjonar av lokale heltar i inn- eller utland.

- Gratulerer med dagen!

- Jo da, takk, takk

Pål Haugen Lillefosse

Me skriv 1. desember 2012. Pål Haugen Lillefosse (G12) er 11 år gammal, men har alt prestert å nå opp i 1103 tyrvingpoeng som 12-åring! Me brukte store ord om Pål, då han svinga seg over 3,10 i stav sist lørdag. Denne lørdagen steig han endå høgare - heile 3,21 er Pål sin nye rekord på. Det er naturlegvis klubbrekord. Det er bestenotering over heile fjøla. For å ta eit enkelt bilete: Det er tre år (i alle fall nesten) til Pål kan kjempa om junior-NM- plass, men alt no er han berre ni centimeter unna kravet til junior-NM...

Monika Benserud (J17) sesongdebuterte i stav med 2,81 (844 poeng).

Eirik Leikvoll (G15) betra seg med ein heil centimeter frå sist lørdag - frå 2,90 til 2,91 (793 poeng).

Broder Magnus Leikvoll (G17) kom seg over 3 meter denne gongen, til 3,01 (555 poeng).

Så her var fleire gode stavhopp, altså, men framfor alt ein ny strålande stavhopp-lørdag i Høiehallen for Pål.

UM 2013 - i stigning trass stille

Vel, eg tenkte eg skulle la kvalifiseringsoversikten til UM 2013 (ute) ligga til innesesongen var komen godt i gang. Men så skjer det ein del ting fram og tilbake med medlemsmassen, og først og fremst skjer det noko i samband med at BFG no blir utan Fana. Det har den konsekvensen for Gneist at opptil fleire Fana-utøvarar blir Gneist-medlemmer frå 1. januar.

Nokre har alt gjort den formelle jobben, andre ventar enno litt (sjølv om 31. desember er absolutt siste frist!) - og her er det viktig for både aktuelle utøvarar og for klubb å gjera alt det formelle korrekt.

Sidan sist oversikt, etter utesesongen, er det komen to nye til, slik at Gneist no har 23 utøvarar kvalifiserte til UM på Lillehammer i september neste år. Nett no er det ein kamp mellom G17 og J16 om å ha flest utøvarar med - stilllingen er 5-5.

Her er heile oversikten:

GUTAR
Andreas Iden, G18/19 (3000m)
Ole Martin Røssland, G18/19 (3000m)

Magnus Leikvoll, G17 (stav)
Aleksander Lie, G17 (800m)
Stian Norheim, G17 (3000m)
Håvard Våge Opheim, G17 (stav)
Amund Høie Sjursen, G17 (tresteg, 100m, lengde, høgde)

Emil Engelsen Holm, G16 (100m, 200m)
Stian Øvergaard Aarvik (800m, 3000m)

Henrik Irgens Gravdal, G15 (800m, 2000m)
Eirik Leikvoll, G15 (stav)
Sondre Rinde, G15 (200m, tresteg, 100mh, 100m, 3000mh, lengde)

JENTER
Marianne Benserud, J18/19 (stav, 200m)

Monika Benserud, J17 (stav, lengde, tresteg, 100m, 200m)
Vilde Lund Bjørnsen, J17 (100m, 200m, 400m, lengde)

Elina Drivenes, J16 (200m, 800m)
Thyra Hevrøy, J16 (300mh)
Ingrid Næss Johansen, J16 (800m)
Ingrid Helene Nyhus, J16 (800m)
Anna Serine Røssland, J16 (800m)

Cathrine Harris, J15 (kule, tresteg, lengde)
Renate Lie, J15 (200m, 800m, 100m)
Maren Haugen Lillefosse, J15 (100m, 200m, lengde)

Hopp x 2

Trass i at underteikna aldri har sett sine bein i ei stille lengde-grop, så har eg for vane å reklamera ganske heftig for eit par av stille hopp-konkurransane kvar vinter.

Det er dei hopp-konkurransane som faktisk er dei klart viktigaste for Gneist i lagserien. Vel, det er rett og slett sjelden Gneist-utøvarar har hopp-resultat utan fart frå andre stader enn nett desse to stemna.

Det første er KM i hopp utan fart, som i 2013 er sett opp på Laksevåg lørdag 26. januar.

Det andre - og det desidert viktigaste! - er det tradisjonstunge hoppstemnet på Ytrebygda skole fredag 22. februar. Det er viktigast nettopp fordi såpass mange resultat kjem her - frå rekruttar, via dei fleste aldersgrupper mellom ungdommane og til dei særs gamle (over 40).

Gneist gjer det svært bra i lagserien for tida. Utan alle dei gode resultata frå nettopp desse to hopp-stemna ville det sett noko annleis ut. Til saman 30 resultat frå stemna vinteren 2012 er teljande på laga våre i lagserien i år, fordelt på 11 hos jentene og heile 19 resultat mellom gutane.

Lyset har gått

Dette er ei kort soge om det offentlege forfallet. Me høyrer om det kvar dag på kanskje alvorlegare arenaer - som helse og skule. Men du verda, idretten er også eit svært viktig samfunnsområde. Og ein merkar det offentlege forfallet godt også her.

Om det er blårussen eller deira frendar som styrer, det veit eg ikkje. Men budsjettstyringa er blitt oppsplitta og kortsiktig: Det handlar om å nå budsjettmål for skilde sektorar og innanfor konkrete budsjettår. Ein har slutta å sjå samanhengar - både mellom ulike område og over tid.

I eit slikt system forsvinn til dømes vedlikehald som størrelse fullstendig. Då eg vaks opp var "vaktmesteren" ein konkret person som me helste på og meinte me kjente slik nokolunde, enten det var på skulen eller på idrettsanlegget. I dag er vaktmesteren ein utdøande rase. I staden for vedlikehald dett skulebygg og andre offentlege eigedommar ned over hovuda på brukarane, heilt til det blir ropt høgt nok krise og dei falleferdige bygga blir erstatta av heilt nye.

Frå 1. oktober forsvann dei faste vaktmesterane frå idrettsanlegga til Bergen kommune, mest merkbart for svært mange at ufatteleg dugande vaktmesterar forsvann frå Fana Stadion.

Siste nytt er at lyset fullstendig har gått for dei som sit med ansvaret for dette: Frå og med i går, mandag 26. november, så er "tilbodet" stramma inn ytterlegare: Lys, garderobar og toalett blir skrudd av og stengde. Det er som ein både må springa bak ein busk og klypa seg i armen samtidig.

Det siste er sikkert ei naturleg følgje av det første i denne saka: Når vaktmestrane er fjerna, så må ein altså stenga av.

Bloggaren brukar ikkje så store ord som bloggar så ofte, men utanom bloggen er det no annleis. Men i dette tilfellet må det berre seiast også her: Når lyset har gått for byråkratar og politikarar, då må nokon koma og hjelpa dei ut frå mørket - vekk frå kalkylane og skrivebordssystema og til der verkelegheten finst.

Det offentlege forfallet er ein skandale. Dette er ein skandale.

Øvergaard Aarvik-show (Vinterkarusellen-2)

Det var fabelaktig gode forhold til "vinter" å vera, då den andre Vinterkarusellen til BFG gjekk av stabelen mandag kveld. Det blei sprunge rasfort av svært mange - inkludert mange av våre lokale heltar.

Igjen: Oversikten som finst nedanfor er fullstendig etter underteiknas eige hovud, men den tar utgangspunkt i "Gneist og omland".

Framfor alt var dette kvelden til mamma Torun og eldsteson Stian Øvergaard Arvik. Torun vann 10 km for kvinner, medan 15-åringen Stian sprang ein strålande 10 km for menn - og vann han også.

5 KM KVINNER
Her rykka Thyra Hevrøy heilt til topps på lista med sitt løp på 20.21. Thyra er offisielt Gneist-utøvar frå komande årsskifte. Her er topp ti etter to løp.

1. Thyra Hevrøy 20.21
2. Linn Seliussen 20.29
3. Silje Stenersen 21.16
4. Tuva Straume 22.27
5. Sanne Lillevik Christensen 23.38
6. Pernille Hordnes Sørås 24.06
7. Marlen Eide Røssland 24.32
8. Anne-Marte Aldal Sætre 24.37
9. Sara Tyssebotn Berg 25.07
10. Margrethe Irgens Gravdal 26.15

5 KM MENN
Heilt i toppen held alt nemnde Stian Øvergaard Aarvik stand, men både Hans-Magnus Haukøy, André Seliussen og Thomas Blücher leverte flotte løp mandagskvelden.

1. Stian Øvergaard Aarvik 16.25
2. Bjarte Eikanger 16.36
3. Henrik Irgens Gravdal 16.56
4. Jørgen Austvik 17.02
5. Andreas Iden 17.07
6. Hans-Magnus Haukøy 19.51
7. André Seliussen 19.51 (-1.07)
8. Morten Seliussen 19.56
9. Thomas Blücher 20.54 (-1.21)
10. Eirik Måren Sæle 26.23

10 KM KVINNER
Her er "lista" svært kort, sjølv om det er ein formidabel auke frå 0 sist, til 1 no:

1. Torun Øvergaard Aarvik 41.51

10 KM MENN
Her er kanonløpet til Stian Øvergaard Aarvik alt nemnt, men svært gode løp også frå trenar Bjarte Eikanger, Jørgen Austvik, Ole Martin Røssland, Andreas Iden og Stian Norheim:

1. Stian Øvergaard Aarvik 33.56
2. Bjarte Eikanger 33.57
3. Jørgen Austvik 35.15
4. Ole Martin Røssland 35.16 (-1.16)
5. Andreas Iden 36.19
6. Morten Seliussen 37.38
7. Stian Norheim 39.51 (-1.53)
8. Jens Larsen Åstveit 40.36

I tillegg manglar det vel ei tid på Erlend Gjerdevik Sørvtveit på 10 km. Han står oppført med ei noko tvilsam tid på 5km. Erlend sprang vel saman med Andreas og skal ha ei tid rundt hans...

Neste gong er det på med nissehua; 17. desember.

Mai-nytt

Først: Sentrumsløpet i Oslo er det ein del som satsar fram mot, mellom anna har ei av våre heilt ferske Gneist-medlemmer, Linn Seliussen, alt gjort store ting i Sentrumsløpet i ung alder. Dette løpet går komande vår den 27. april.

Men, så til mai:

... Eller, aller først til juni: Gneist vann jo lagkonkurransen i Tyrvinglekene 2012, men Gneist vann i tillegg samanlagtkonkurransen for Tyrvinglekene og Romerikslekene. Nett det var ein svært sterk prestasjon, sidan Gneist-"troppen" til Romerikslekene var svært så tynn: Berre Monika Benserud forsvarte Gneist-fargane på det fine stadionet på Lillestrøm.

Éin grunn til det var at Romerikslekene i 2012 gjekk nøyaktig same helga som Mailekene i Haugesund. Til Mailekene har Gneist-kontingenten berre blitt større og større dei siste åra. Men i 2013 blir desse arrangementa å finna på ulike helger:

Romerikslekene går helga 25. - 26. mai. Det er same helga som det er NM og UM i banestafettar i Sandnes, så dei som blir tekne ut til å vera med i Sandnes kjem seg ikkje til Lillestrøm.

Mailekene går ekstra tidleg i 2013 - nemleg søndag 19. mai og mandag 20. mai. Det vil med andre ord seia at stemnet går på den splitter nye banen, like ved innandørshallen, 1. og 2. pinsedag - langhelga som startar med fredag 17. mai.

... Så då blir det vel 17. mai-feiring i Kvinnherad i 2013, vil eg tru...

Historietime: Junior-NM i 2004

Sommaren 2004 blei junior-NM skipa til i Trondheim. BFG (Fana) var inne i ein svært god tidsperiode, med flotte prestasjonar i mange - og mange varierte - øvingar.

Benedikte Liland (U20) hadde eit nytt flott meisterskap. Aller best gjekk det i tresteg, der ho blei norgesmester med 12,20, 12 centimeter framfor nr. 2. I kule blei det 10,75 og 4. plass, i lengde 5,49 og 5. plass. (Her vann dagens superhoppar i øvinga, Margrethe Renstrøm med 5,85.)

Den gongen Gneist-kastarane Steffen Nerdal og Andreas Eeg markert seg også i dette meisterskapet. Steffen vann diskos (53,38, her var han 8,3 meter framfor nr. 2), tok sølv i slegge og fjerdeplass i kule (her var han 9 centimeter bak bronsen og 10 bak sølvet...). Andreas tok to fjerdeplassar, i diskos og slegge.

Morten Benserud tok eit nytt meisterskap på 400 meter hekk, her blei broder Marius nr. 4.

Hilde Hovlandsdal vann bronse i høgde (U20) med eit hopp på 1,72.

Bronse blei det også på stafettlaget i MU20, der Espen Liland, Marius Benserud, Håvard Hasås og Morten Benserud sprang.

Eirik Karstensen hoppa 1,97 i høgde (MJ22) og tok med det ein 4. plass.

2013 er i gang...: ein pangstart

I følgje Mayakalenderen - eller tolkarane av den - skal verda gå under 21. desember. Det er ikkje difor me tar 2013 få forskot. Det handlar om at innesesongen med Gneist-auge starta i Høiehallen lørdag: Innesesongen varer til og med 30. juni 2013, utøvarane stiller i aldersklassen dei tilhøyrer til neste år og resultata gjeld i seriesamanheng 2013. Så då så...

Og det blei ein pangstart:

Pål Haugen Lillefosse (G12!) persa i stav til 3,10. Dermed har Pål nådd i tyvingpoeng-taket alt - med 1085. (Til samanlikning enda han på 1051 poeng for stavresultatet sitt sist vinter.) Det er ny klubbrekord i 12års-klassen med 85 centimeter! Og den gamle (tilhøyrande Helge Otterlei) var frå 1984 - 29 år sidan og det året Eirik Kvalfoss blei olympisk meister i Sarajevo (ikkje i stav). Fabelaktig!

Marianne Benserud (J18) sesongdebuterte med 3 meter akkurat (880 poeng). Også Marianne sette klubbrekord - her var den ledig.

Brørne Eirik (G15) og Magnus Leikvoll (G17) enda begge med 2,90 som resultat lørdag. Hoppa er verdt høvesvis 790 og 636 poeng. I mellom der, på poeng, kom Håvard Våge Opheim (G17), som med 3,00 oppnådde 706 poeng.

I tillegg til stav blei det skipa til den lite kurante og heller sjeldne øvinga tresteg utan fart i Høiehallen lørdag ettermiddag. Her har me dei siste åra likevel notert klubbrekordar, så då får me no halda fram med det:

- Pål Haugen Lillefosse (G12) hoppa 6,25 (klubbrekord; den gamle hadde Eirik Leikvoll på 5,36, frå 2010). Pål persa med 80 centimeter frå fjorårssesongen.

- Eirik Leikvoll (G15) tok tilbake éin klubbrekord, då han landa på 7,27 (ledig rekord).

- Og Magnus Leikvoll (G17) gjorde det same; fekk seg ein klubbrekord der det tidlegare ikkje har vore notert. Han landa fire centimeter lengre borte i gropa enn broder Eirik; 7.31.

Kvalifiseringsoversikt, BFG - 2013

Det skal noko til å følgja med; kven er BFG-utøvarar i 2013 og kven er det ikkje? Det kjem stadig noko nytt på medlemsfronten. Det skal det ikkje gåast i detaljar om her, men i staden kjem det i dette innlegget ein oversikt over dei som er kvalifiserte til meisterskap i BFG-drakt i 2013 - av dei som pr. dato er i BFG eller ein av dei to moderklubbane.

Så får me justera oversikten etter kvart som ny informasjon måtte koma.

Kvalifiserte for SENIOR-NM (Tønsberg, august 2013) er så langt:
- Marianne Benserud
- Monika Benserud
- Vilde Lund Bjørnsen
- Martine Eikemo Borge
- Benedikte Liland
- Maren Haugen Lillefosse
- Elise Una Mikkelsen
- Pernille Thomassen

Kvalifiserte for JUNIOR-NM (U20) (Overhalla, august 2013) er:
- Marianne Benserud
- Monika Benserud
- Sara Berrefjord
- Vilde Lund Bjørnsen
- Elina Drivenes
- Cathrine Harris
- Thyra Hevrøy
- Ingrid Næss Johansen
- Renate Lie
- Maren Haugen Lillefosse
- Elise Una Mikkelsen
- Ingrid Helene Nyhus
- Anna Serine Røssland

- Andreas Iden
- Ole Martin Røssland
- Amund Høie Sjursen


Kvalifiserte for JUNIOR-NM (U23) (Overhalla, august 2013) er:

- Jørgen Austvik

- Jørgen Jensen Axelsen

JA til BFG Bergen

Den 5. desember er det kalla inn til ekstraordinært årsmøte i Friidrettsklubben BFG Fana.

Det står éi sak på agendaen: Namnebytte til "Friidrettsklubben BFG Bergen".

I praksis vil klubben forbli "BFG" for dei fleste av oss, slik den er i dag.

Likevel er eit namnebytte blitt viktig. Det er ein del av oss - bloggaren inkludert - som i lang tid har undra seg over at me har hatt to (friidretts-)klubbar med så like namn: Fana og BFG Fana. Gang på gang har eg opplevd at utanforståande har omtalt BFG som "Fana". Eit døme: Under NM i terrengløp i Trondheim hausten 2011 vann både Kristian Blummenfelt og Kirsten Melkevik gull for BFG. Speakeren sa konsekvent at desse var frå "Fana" - punktum.

Dette skjedde nesten eit heilt år før Fana IL si friidrettsgruppe fann på å gå ut av BFG-samarbeidet. Då det skjedde blei det endå meir openbart at BFG treng eit klubbnøytralt namn. Med "Friidrettsklubben BFG Bergen" kan me på eine sida halda på "BFG" som det som me til kvardags vil bruka, samtidig som "etternamnet" blir så inkluderande at me både kan invitera andre samarbeidsklubbar inn og invitera Fana IL tilbake igjen i falden, når det skulle vera.

Fana IL si friidrettsgruppe vedtok utmeldinga si under eit svært kontroversielt ekstraordinært årsmøte 26. september i år. Etter ei lang intern tautrekking internt i Fana er no utmeldinga endeleg stadfesta. Les meir om dette her.

Då meldinga først kom om at Fana ville ut, var det mange som lurte på om me no skulle heita "BG" eller liknande, sidan F'en i "BFG" står for Fana. Det er heilt uaktuelt å endra på BFG-namnet. Det er eit sterkt særnamn i friidretten og i området, som me for all del skal halda på. BFG står for "Bjarg, Fana og Gneist". Og Bjarg, Fana og Gneist vil for alltid vera klubbane som i si tid stifta paraplyklubben BFG - heilt uavhengig av kva kvar enkelt av desse klubbane finn på av krumspring i ettertid.

Det er mange måtar å sjå på forslaget om namnebytte. Éin viktig måte er at dette er ein del av ei offensiv strategi; å hevda klubben og visa at den er i høgste grad levedyktig og framtidsretta.

JA til BFG Bergen den 5. desember!

Den nasjonale lagserien

Bloggen har jo sitt sterke fokus på den lokale lagserien, i Hordaland, der Gneist gjer ein solid figur år etter år.

Men det finst altså  ein faktisk endå gjævare lagserie; den nasjonale for seniorar.

Den blei avslutta 31. oktober og det datt inn ein god del hastig raska saman stemne frå klubbar som faktisk satsar tungt på lagserien dei siste dagane i oktober månad. Slikt gjer ikkje BFG, i alle fall ikkje for tida. Ein tenker nok der at prestasjonane gjennom den eigentlege sesongen får vera det me stiller med i lagserien, og så held me oss unna desse "krampe-stemna" heilt på tampen.

BFG sine kvinner var 3. best i heile landet i 2012, og lagserie-general Bjørge Pedersen skriv "...Etter fjorårets bronse ble det 6. plass i år, selv om plassen over hadde vært i boks om de hadde dekket opp den øvelsen de manglet. BFG har mange unge og lovende utøvere, og kan fort forbedre seg til neste år."

Så det blei altså 6. plass i 1. divisjon (som er "toppserien" i denne samanheng), mot 3. plass i fjor for BFG-kvinnene sitt 1. lag. Sportsklubben Vidar sneik seg forbi Tjalve på oppløpet og vann, medan Gular - med ein solid dose Laksevåg-innslag - tok 3. plassen.

For menn har ikkje BFG vore i øvste divisjonen sidan 2006, men dei er i klatremodus: I fjor blei det opprykk frå 3. divisjon, i år var BFG-mennene (/-gutane) ikkje langt unna eit nytt opprykk frå 2. divisjon. Til slutt blei det 7. plass av dei totalt 14 laga i 2. divisjon.

Aller best - i 1. divisjon - for menn var Tjalve (for sjuande året på rad), framfor Sandnes og Norna-Salhus på 3. plass.

BFG opererer med to 2. lag også: Kvinnene sitt 2. lag blei nr. 15 i 3. divisjon (ned frå 7. plass i 2011), medan mennene sitt 2. lag blei nr. 20 i 3. divisjon (opp frå 21. plass året før).

Oppslag og tilhøyrande lenker til meir detaljar om årets nasjonale lagserie finst her.

Travel veke (terminlistenytt)

Veka frå og med helga 6.-7. april til og med helga 13. - 14. april 2013 kan bli svært travel for dei som spring lengre og i terrenget.

Det blir innleia med KM i terrengløp i regi av IL Varegg i området rundet Skansemyren lørdag 6. april.

Dagen etter - søndag 7. april - inviterer Varegg alle interesserte tilbake til historias andre "2manns-terrengstafett" i det same området. Den første gjekk av stabelen tidleg på våren i 2012 og blei vunnen av Andreas Iden og Ole Martin Røssland. Også ei rekkje andre av våre utøvarar gjorde det skarpt i nyvinninga. Her er Kondis-reportasjen derifrå. 

Onsdag 10. april blir det endå meir tradisjonsrike Fristafetten på Espeland. Her stiller både Gneist og BFG med opptil fleire lag.

Og så blir veka, for dei ivrigaste, avslutta med NM/UM i terrengløp, kort løype, på Hønefoss i Buskerud.

Heldigvis er det påskeroleg i forkant av denne veka, og det ser etter måten roleg ut på terminslista dei neste par vekene i etterkant også.

Historietime: UM 2004

Ja, det er lett å gløyma, no når tidene er gode og mange presterer godt i Gneist-trøya, at det har vore gode tider også tidlegare - og til og med for ikkje så mange år sidan.

Då det var UM på Fagernes i Valdres seinsommaren 2004, ja så blei det hausta mange medaljar og gode plasseringar frå Gneist-utøvarar.

Marius Benserud (G15) vann gull på 100 meter hekk på 14,55. Han var nesten sekundet framfor sølv-vinnaren. Marius blei dessutan dobbeltvinnar, då han også tok med seg 300 meter hekk (41,04), og han vann sølv på 200 meter (24,13).

Espen Liland (G15) vann bronse både på 100 meter med 11,99 og på 200 meter med 24,30.

Håvard Hasås (G17) er alt omtalt som dobbeltvinnar frå UM på Bislett i 2002. I 2004 var han tilbake og vann både 400 meter (51,18 - 1,25 sekund framfor nr. 2) og 800 meter (1:56,89).

Kasteklubben Gneist fanst framleis så seint som i 2004: Steffen Nerdal vann slegge (61,61) og diskos (50,27 - 7,5m framfor nr.2) og tok bronse i kule, Andreas Eeg tok bronse i slegge og blei nr. 4 i diskos (36cm bak bronsen). I tillegg blei Haakon Arnesen sjettemann i slegge. Alle desse konkurrerte i G18/19 - eit teikn på at stordomstida for kasteklubben gjekk mot slutten.

Sandra Tennøy (J16) fekk fleire fine plasseringar. Best gjekk det i høgde, der det blei sølv (1,58).

Benedikte Liland (J17) var ein av forgrunnsfigurane i meisterskapet. Ho vann gull i tresteg (12,09) og lengde (5,53). Det blei bronse i kule og på 100 meter hekk. På hekken blei Ida Marucssen nr. 4 og Hilde Hovlandsdal nr. 5. Hilde Hovlandsdal plukka også med seg medalje: sølv i høgde (1,67).

Morten Benserud (G18/19) tok sølv på 400 meter hekk.

Kristoffer Grindedal (G15) debuterte i UM med sølv på 800 meter (2:08,94).

Om ikkje alt dette var nok: To blad Benserud (Mats og Marius), Kristoffer Grindedal og Espen Liland var i tillegg på sølvlaget i 1000 meter stafett i G15/16.

Totalen: 8 gull, 6 sølv og 6 bronse.

Det er noko å sikta mot for gjengen som skal til Lillehammer hausten 2013.

*
Og for alle dei som lurer: Trass i dette gylne året, så var det ingen frå Gneist som deltok i inne-UM i Drammenshallen i 2004.

Romjulsstemnet - oppdatert

Friidrettsklubben BFG sitt romjulsstemne blir klubbens første banestemne på ganske lenge. Det skjer lørdag 29. desember. I fjor, då det var Gneist som arrangerte romjulsstemnet, gjekk stemnet på ein fredagskveld. I år har det blitt ei arbeidsdeling mellom Stord og BFG, slik at Stord skipar til sitt romjulsstemne fredagen og BFG sitt om lørdagen.

Ei anna arbeidsdeling er at Stord arrangerer hopp og kast, forutan 60 meter, i sportssenteret sitt ved sida av Stord Stadion. BFG sitt stemne blir eit reint løpsstemne i Leikvanghallen.

Distansane blir 60 meter, 200 meter, 800 meter og 1500 meter.

Dermed blilr det naturlegvis heilt nye "romjulsstemnerekordar" (!) på 1500 meter, som blir ny distanse for året.

I terminlista ligg til og med eit tidsskjema inne alt, med start på 60 meter kl. 13.00 (200 meter kl. 13.30, 800 meter kl. 14.00 og 1500 meter kl. 14.20) - med dei justeringar som måtte koma fordi utøvarar jo melder seg på konkurransedagen til dette stemnet.

BFG er ein klubb for utøvarar frå 15 år og oppover, men dette stemnet er inkluderande og inviterer utøvarar frå 11 år og oppover til å springa.

Og det er framleis over ein månad igjen til å trena på.

Institusjonalisering

Ifølgje det moderne leksikonet, Wikipedia, så betyr ordet Institusjonalisering følgjande:

Institusjonalisering betyr å få noe inn i faste, regelstyrte former eller gjøre det til en institusjon

Hausten 2011 tok underteikna, eldstemann og Norheim-ungdommen til med meir eller faste søndagsturar på "4-fjells-sida" av byfjella. Lite visste vel me at alle desse (søn-)dagane som berre kjem og går var del av ei institusjonalisering. Men det viste dei seg altså å vera.

Andre institusjonar i vår del av verda er Gulfjell-turen til Jan Fjærestad og kompani og - faktisk - mandagsturen til Torstein Erichsen. Sistnemde starta med ein epost ein aprildag for eit par år sidan. Torstein sa at han sprang no sjølv likevel i Hordnesskogen eller på Stendafjellet mandagskvelden, så kvifor ikkje slå følgje? Og no er mandagsturen fast innslag i treningstilbodet i Gneist.

Og no søndag, godt og vel eitt år sidan me no starta med å ta oss ein tur over Vidden, ja så var det seks ungdommar og ein eldre kar (trenar Bjarte) som var på den faste søndagsturen i byfjella.

Ein institusjon er innstifta.

Og kor blei det av eldstemann av stiftarane? Jo da, han slenger no med innimellom, sjølv om det er mest som sjåfør. Men i dag var eg følgje for den andre ungdommen i heimen. Det blei "berre" ein time og tre kvarter på oss - men det var no såpass at me kjende oss som del av byfjell-institusjonen på søndagar me også.

Blåmann, blåmann (blåmann): Kronprinsar frå Gneist

Varegg driv og arrangerer løp i terreng og motbakke på stadig nye og finuerlege måtar. No på seinhausten har det vore tre løp til Blåmanen - den haugen som ligg i bakkant av Brushytten. Konseptet er å nå opp til same målgang, men langs tre ulike traséar for kvart løp. Kvart løp tel som individuell konkurranse, men det er i tillegg ein samanlagtkonkurranse.

Første løpet gjekk for fire veker sidan, det andre for to veker sidan og det siste gjekk lørdag i eit saftig regnver.

Stian Hovind-Argemund frå arrangørklubben blei kongen av dette arrangementet. Han vann like så god alle tre etappane, men i første og siste løp markerte to kronprinsar frå Gneist/BFG seg: Stian Øvergaard Aarvik blei andremann totalt i løp 1. Han slo då den sterke distanseløparan på bane, Marius Vedvik frå Gular, med god margin.

I det siste løpet var det Ole Martin Røssland sin tur å ta andreplassen. Han er etter kvart ein driven løpar i bergensfjella på Fløyen-sida, men denne gongen lærte han seg endå fleire stiar til bruk på søndagsturane i framhaldet.

Terminlistenytt (blogginnlegg nr. 600)

Innomhus-sesongen nærmar seg med store steg. I tillegg er det omtrent muleg å ha oversikt over kva for tilbod den kjem til å innehalda. Det er muleg å reisa litt, men det er også muleg å ha eit fullgodt tilbod med å halda seg i Leikvanghallen.

Stavhopparkolonien i Bergen og omland får no sine arrangement administrert av IL Gneist. Og her blir det i alle fall tre stavkonkurransar før jul, med start alt 24. november og med nye konkurransar 1. og 9. desember. Stavhopparane synest det er like triveleg i Høiehallen, så desse konkurransane finn stad der.

Nord i Åsane bevegar ein seg til når BFG arrangerer romjulsstemne lørdag 29. desember. Tredagarsstemnet til Norna-Salhus - Nornalekene - følgjer tredje helga i januar (18. - 20. januar), med eit etter måten tett og godt øvingsprogram. Gneist sine pingvinlekar blir også til tradisjon når dei blir skipa til for andre gong 9. - 10. februar. Stadig oppdatert info finst her.

I 2012 blei innomhus-KM flytta rundt omkring i terminlista. Difor får me no vera på trygge sida og seia at førebels KM-dato i 2013 er 3. mars. Dette er KM frå 15 år og oppover over éin dag, så kva som skjer med resten av tilbodet frå tredagarsstemnet i 2012, det gjenstår å få oversikt over.

Noko nytt ute? Vel, Varegg inviterer til KM i terrengløp lørdag 6. april på Skansemyren. Det har me all grunn til å tru at kjem til å bli eit framifrå arrangement. Varegg er rasande flinke til å arrangera utanfor bane.

Så blir det spennande å sjå kva Osterøy har tenkt å finna på. I følgje terminlista skal også dei arrangera KM i terrengløp - dagen etter, 7. april. Vel, etter at kretsen har slite med å finna KM-arrangør i fleire år, så kan det sjå ut som det blir skikkeleg kampanje om arrangementet i 2013. På den andre sida; det er sikkert berre nokon som tøysar med oss.

Spisskompetanse - Alle tider, J17 og G17, 2012

Dei er ikkje så mange, 17-åringane våre. Dei har heller ikkje mange markeringar i historikk-oversikten. Ein annan - og meir positiv - måte å seia det på er at dei har solid spisskompetanse, som ofte er naturleg når ein er mellom dei eldre ungdommane.

Marianne Benserud er einsleg svale mellom jentene i 17års-klassen. Hennar stavhopp på 3,31 er det 6. beste i årsklassen gjennom tidene.

Dei to gutane som markerer seg i same årsklasse har vel aldri sett sine bein i ei stavgrop. Deira spisskompetanse er springing og då dei lengste løpa:

På 5000 meter har Ole Martin Røssland og Andreas Iden smålåtne markeringar. Der er Ole Martin nr. 70 med sine 15:35,93 og Andreas nr. 93 med 15:43,71. Men på den doble distansen, 10000 meter, kjem spisskompetansen klarare til syne: Her plasserer Ole Martin seg som nr. 7 med sitt løp frå april i år på 33:06,61, og Andras er nr. 10 med sitt mil-løp (same morgonløpet siste søndagen i april som Ole Martin) på 33:24,10. (Tidene er også 3. og 5. best i Hordaland gjennom alle tider.)

... Og i 18års-klassen har me ikkje hatt nokon representant i 2012...

Spydspissen Amund - Alle tider, G16, 2012

I serien av utøvarar som har har hatt ein framifrå sesong i 2012 er det uråd å koma utanom Amund Høie Sjursen. Han har hatt stor framgang, han har plukka med seg flotte plasseringar (inkludert UM-medalje) og prestert flotte tider og lengder. Det skjer i tillegg i ein årgang som har svært sterk konkurranse i Amund sine øvingar. Aller skarpast har Amund gjort det i lengde - og her er også den øvste markeringa i historikken - ein 18. plass.

Han er ikkje åleine som markerer seg i Alle tider-statistikken for 16-åringar. Aleksander Lie og Stian Norheim har eit kvar sitt besøk frå 1500 meter hinder-løp frå høvesvis Framolekene og UM.

Aleksander Lie
- nr. 58 på 1500 meter hinder (4:46,97)

Stian Norheim
- nr. 62 på 1500 meter hinder (4:47,78)

Amund Høie Sjursen
- nr. 18 i lengde (6,71)
- nr. 25 på 60 meter (7,27)
- nr. 62 på 100 meter (11,41)

Best i hopp - Alle tider, J16, 2012

Det er to jenter som markerer seg i Gneist-drakta i J16, Vilde Lund Bjørnsen og Monika Benserud. Til saman har dei også i år ein fin bunke markeringar i Ale tider-statistikken i sin årsklasse - Vilde har vel nokre færre enn det me er vane med og Monika har nokre færre i toppen. For hennar del er det ein tydeleg trend at ho er nærmare toppen i hopp-øvingar enn i løpsøvingar. Høgast oppe er ho i tresteg, der ho også blei juniormeister i 2012 og representerte Norge i nordisk meisterskap for juniorar.

Litt lokale duellar finn me også på denne historiske oversikten: På 400 meter er Vilde eitt hundredel bak Kjersti Ristesund (Bjørndal) si tid som 16-åring (1986...), medan det er heile fire jenter frå Hordaland mellom dei totalt ti framfor Monika i tresteg. To av hordalandsjentene representerte Gneist; Amalie Tefre Skage og Benedikte Liland. Og sistnemnde landa to centimeter lengre borte i tresteg-gropa som 16-åring enn det Monika gjorde.

Monika Benserud
- nr. 11 i tresteg (11,72)
- nr. 31 i stav (2,73)
- nr. 40 på 60 meter (8,00)
- nr. 41 i lengde (5,62)
- nr. 44 på 100 meter (12,46)
- nr. 47 på 80 meter hekk (12,05)

Vilde Lund Bjørnsen
- nr. 28 på 400 meter (57,91)
- nr. 48 på 200 meter (25,66)

Stians gjennombrot - Alle Tider, G15, 2012

Ein kan seia mykje fint om Stian Øvergaard Aarvik. Han er ein sympatisk, ung mann, naturlegvis - og i tillegg har han teke til å springa nett så styggfort som me lenge har hatt mistanke om at han kan vera i stand til.

Ein del skadetrøbbel og andre vanskar har plaga Stian tidlegare, men i 2012 har han slege grundig til. Det var også den første sesongen som junior og første sesong med UM-deltaking. Formtoppen kom då også under UM på Askøy, med bronse og eit glimrande løp på 2000 meter.

2000 meter er også ein av to øvingar der Stian har fått seg ein plass mellom dei historisk beste i landet mellom 15-åringar. Tida hans frå Askøy, på 5:52,87, er den 30. beste i landet på distansen gjennom tidene.

No var det ein del av oss som blei overraska over at Stian valde vekk 1500 meter hinder som UM-distanse. Overraskinga var der fordi Stian sprang sitt først og til no einaste hinderløp under Framolekene, og det gjorde han på ein overbevisande måte. Tida blei 4:47,26, som er 21. beste tida på distansen for 15-åringar gjennom tidene.

Lengst muleg - Alle Tider, J15, 2012

Det må ha vore noko med 1997. Det må ha vore noko med alt det solskinnet, som vel varde frå mai til september. Det var rett og slett ein fantastisk sommar det året. Kanskje trudde ein del av dei nyfødde at dei var fødde på slettelandet i Afrika, eller deromkring.

Langt likar i alle fall mange frå 1997-årgangen å springa. I BFG er jente-gjengen mellom 1997-arane ganske svær - i Gneist er den også stor, og i ferd med å bli større.

Og naturlegvis har jentene markert seg også i Alle Tider-statistikken på landsplan for J15. Og trioen har delt dei til saman seks plasseringane søsterleg mellom seg:

Ingrid Næss Johansen
- nr. 4 på 5000 meter (19:06,68) - best i Hordaland
- nr. 59 på 2000 meter (6:55,77)

Ingrid Helene Nyhus
- nr. 78 på 2000 meter (6:59,18)
- nr. 88 på 3000 meter (10:41,98)

Anna Serine Røssland
- nr. 3 på 2000 meter hinder (7:49,35) - best i Hordaland
- nr. 12 på 1500 meter hinder (5:25,81) - nr. 4 i Hordaland

Svært år for Sondre og Henrik - Alle Tider, G14, 2012

Henrik Irgens Gravdal og Sondre Rinde er 14-åringane våre som markerer seg i Alle Tider-statistikken på landsbasis etter 2012-sesongen. Og dei markerer seg til gagns. Aller øvst tronar 3000 meter-tida til Henrik. Den var aldersrekord md over ti sekund - og han legg namn som Thomas Solberg Eide, Sondre Nordstad Moen og Henrik Ingebrigtsen langt bak seg. Aldersrekord nasjonalt blei det også på Sondre. Med 14,42 på 100 meter hekk (84 cm). Dette er så mykje som 8/10 betre enn Dimna-løparen Hallbjørn Hasund Thorseth si gamle bestenotering.

I tillegg til fleire glitrande plasseringar nasjonalt, så er dei også heilt i teten i Hordaland på fleire øvingar: Henrik sette kretsaldersrekord på 600 meter (11/100 framfor Jonas Gjesdal sin gamle). På 1500 meter er han nest-best i Hordaland (8/10 bak Lars Lunde sin rekord). Sondre sette kretsaldersrekord på 80 meter hekk (84cm; her har det jo vore ein del endringar fram og tilbake med hekkehøgde gjennom tidene). Tida hans på 200 meter hekk er nest best i Hordaland (16/100 bak kretsaldersrekorden til Marius Bull Hjeltnes). Nest best er han også på 300 meter hekk, der kretsrekorden tilhøyer Markus Loftås frå Osterøy.

800 meter-tida til Henrik er elles eit halvt sekund bak Henrik Ingebrigtsen si tid på distansen som 14-åring, men eit halvt sekund framfor olympiameister Vebjørn Rodal sine bravadar på same alder.

Her er oversikten:

Henrik Irgens Gravdal
- nr. 1 på 3000 meter (9:06,01)
- nr. 5 på 600 meter (1:27,72)
- nr. 10 på 1500 meter (4:16,03)
- nr. 43 på 800 meter (2:05,16)

Sondre Rinde
- nr. 1 på 100 meter hekk (84 cm) (14,42)
- nr. 3 på 300 meter hekk (43,40)
- nr. 4 på 80 meter hekk (84cm) (11,56)
- nr. 4 på 200 meter hekk (28,35)
- nr. 18 i tresteg (med planke) (12,22)
- nr. 19 på 80 meter (10,33)
- nr. 82 på 200 meter (25,25)
- nr. 102 på 100 meter (12,31

Stadig nye ungdommar (Vinterkarusellen løp 1)

Litt sein i takten i dag, etter tøff valvake. Kva for ein song var det som blei spelt på Barack Obama si vavake i Chicago, både like før han kom på scena i dag tidleg (norsk tid) og så igjen like etter talen hans? Jo da, visst var det vel We Take Care of Our Own av sjølvaste Bruce.

No er eg no alltid freista til å kåsera over noko heilt anna, når eg ser ein slik songtittel. Men det skal eg ikkje gjera. Me skal i staden ta vare på våre eigne: Nedanfor er første versjon av "Vinterkarusellen - lokale helter", med oversikt over bestetider frå Vinterkarusellen, etter kvart som den skrir fram, frå - altså - våre "lokale heltar". Kven er så dei? Jo, i stor grad utgår dei frå friidrettsmiljøet i IL Gneist (små og store), med litt ekstra dryss med BFG-løparar. Og utvalet er hundre prosent underteikna sitt. Her finst det ikkje noko klagegrunnlag!

5 KM KVINNER
Her ønskjer me (formelt frå nyttår) Gneist-nykomarane Linn Seliussen og Tuva Straume velkommen, heilt i toppen av lista. Og jammen har eg ikkje fått plass til to i familien her også (topp 10):

1. Linn Seliussen 20.29
2. Tuva Straume 22.27
3. Sanne Lillevik Christensen 23.38
4. Marlen Eide Røssland 24.32
5. Anne-Marte Aldal Sætre 24.37
6. Sara Tyssebotn Berg 25.07
7. Margrethe Irgens Gravdal 26.15
8. Selma Røssland 31.52
9. Hege Kjærgård 32.01
10. Marie Seliussen 33.55

5 KM MENN
Her sprang Stian Øvergaard Aarvik (15) og Henrik Irgens Gravdal (14) flotte løp og har besøk av BFG-trenar Bjarte Eikanger topp tre. Inn topp 10 fekk me også to Gneist-styremedlemmer, Terje Norheim og Peter Blücher. Eg reknar med at sjef Trond Leikvoll er brukande nøgd med dette, men det må skjerpings til for å halda topp 10-plassane utetter vinteren.

1. Stian Øvergaard Aarvik 16.25
2. Bjarte Eikanger 16.36
3. Henrik Irgens Gravdal 16.56
4. Jørgen Møklebust Austvik 17.02
5. Andreas Iden 17.07
6. André Seliussen 20.58
7. Thomas Blücher 22.15
8. Eirik Måren Sæle 26.23
9. Terje Norheim 27.00
10. Peter Blücher 27.09

På 10km kvinner noterte eg meg rett og slett for ingen på lista 1. løpet. Sist vinter var også dette den skrinnaste klassen, med berre fire løparar med tid i Gneist-familien gjennom heile vinteren.

10 KM MENN
Nokre fleire namn med her. Ole Martin Røssland sprang kontrollert dei først sju kilometrane og fekk så det for seg at han skulle ta igjen ein konkret løpar i løpet av dei siste tre. Det klarte han med glans, men i resultatlista - som av og til lever sitt eige liv - hamna han likevel to sekund bak denne konkurrenten. Pappa Seliussen, Morten, kunne ikkje vera mykje verre enn ungdommane sine og sprang ein solid første 10 km:

1. Ole Martin Røssland 36.32
2. Morten Seliussen 37.38
3. Jens Larsen Åstveit 40.36
4. Stian Norheim 41.44

Neste løp: mandag 26.november

Duellar med Martine - Alle Tider, J14, 2012

Jada, eg får no kikka litt på Vinterkarusellen sitt første løp etter kvart også, men litt tid må dei i teljekorpset (alle er vel i mål no?) få på seg til å få alle resultatlistene fiks ferdige. Sjølv låg eg på sofaen og halvsov, men familien var godt representert - så eg halvsov med i alle fall halvgodt samvit.

Til dagens tema: Jenter 14 og våre jenter i den klassen sine markeringar i Alle Tider-statistikken etter 2012-sesongen. Renate Lie har fleire fine markeringar. I eit par av dei er ho i "tett duell" med årets fremste BFG-utøvar, Martine Eikemo Borge. Også Cathrine Harris og Maren Haugen Lillefosse er å finna på den historiske oversikten etter denne sesongen:

Cathrine Harris
- nr. 11 i tresteg (10,90)

I tresteg har det skifta gjennom åra kor vidt 14 års-jentene har hoppa med satssone eller med planke. Plasseringa til Cathrine er i oversikten over dei som har hoppa med planke.

Renate Lie
- nr. 4 på 1500 meter hinder (5:31,03)
- nr. 7 på 400 meter (60,15)
- nr. 8 på 300 meter (42,20)
- nr. 24 på 600 meter (1:38,83)
- nr. 35 på 1000 meter (3:04,85)
- nr. 57 på 200 meter (26,97)
- nr. 96 på 1500 meter (4:55,29)

Duellane med Martine? Jo, på 1000 meter er det særs tett: Her er Renate 1/100 framfor Martine. På 400 meter er Renate 0,6 sekund framfor Martine (Martine har plukka NM-medaljar i fleng på distansen, både i junior- og seniorklassen, dei siste åra.) På 400 meter er elles Renate like bak Laksevåg-jenta Vilde Svortevik, som i 2012 gjorde det godt i junior-VM.

Maren Haugen Lillefosse
- nr. 14 på 200 meter hekk (30,64)
- nr. 29 i lengde (5,42)
- nr. 32 på 60 meter hekk (9,57)
- nr. 104 på 200 meter (27,43)

Mørke - lys? Eller: Ny veke - nye sjansar

29. oktober 2006 var Ole Martin og eg i Oslo Spektrum på ein fantastisk konsert med Bruce Springsteen & The Seeger Sessions Band. Eitt av høgdepunkta var ein ramlande galen versjon av gospel-slageren This Little Light of Mine.

Me får ta den med oss inn i ny veke.

Den normale bloggen kjem tilbake - om litt.


(Monday), Gave me the gift of love

(Tuesday), Peace came from above

(Wednesday), Told me to have more faith

(Thursday), Gave me a little more grace

(Friday), Told me to watch and pray

(Saturday), Told me what to say

(Sunday), Gave me the power divine

This little light of mine.

Mørke

Eg veit denne bloggen blir litt kryptisk for mange. Frå tid til annan er det slik at me vaksne driv og tøysar og rotar det til. Me gløymer at barn og ungdom er med i idretten for å ha det kjekt. Det meste av tida gir dei blanke i diskusjonar av smått og stort - i alle fall slikt som fort blir stort i vaksenverdas mekanismar - og vil berre møtast, trena og ha det kjekt.

Eg hadde full bil på tur i dag. Fem ungdommar frå Friidrettsklubben BFG tok sjansen på å vera med på tur i Caravellen. Me fann oss parkeringsplass ved Svartediket, lenge før folk flest hadde gnidd svevnen ut or augo sine. Så bar det oppover til Ulriken, over "Vidden" og så litt ulike traséval ned att frå fjellet.

Litt isete var det her og der, men alle var samde om at det hadde vore ein kjekk tur.

Som Torstein pleier seia det; me gamle skal no ikkje bli til noko. Så ganske tidleg i oppoverbakkane bak Ulriksdal tok eg på musikken og stengde pusten ute.

Nett då eg tok til å sjå opp mot toppen av Ulriken, då kom Bruce med ein hjelpande song - slik han jo har for vane i mitt hovud, det er no berre slik.

No var det morgon og ikkje kveld, men kjensla stemte heilt:

'Cause tonight I'll be on that hill 'cause I can't stop
I'll be on that hill with everything I got
Lives on the line where dreams are found and lost
I'll be there on time and I'll pay the cost
For wanting things that can only be found
In the darkness on the edge of town
In the darkness on the edge of town

Eg må medgje at eg her, på utkanten av byen, driv og leitar i mørket nett no.

Sidan denne bloggen blei til i entusiasme over friidretten, over stor glede av å ha ungdommar trygt og godt plassert i gode miljø - i Gneist og BFG, så er eg nett no tvungen til å la bloggen ta pause på ubestemt tid.

Kristoffer markerer seg nasjonalt - Alle Tider, G13, 2012

2012 har vore eit framifrå år for Kristoffer Blücher. Han har prestert ei rekke gode prestasjonar, plukka med seg medaljar og anna finstas i store og små stemne, han har plukka haugevis av nye klubbrekordar i Gneist med seg og jammen markerer han seg ikkje så det susar også i den nasjonale statistikken for 13-åringar gjennom alle tider:

- 1. plass på 300 meter (41,24)
- 4. plass på 400 meter (57,33)
- 6. plass på 200 meter (24,92)
- 6. plass på 600 meter (1:32,31)
- 7. plass på 200 meter hekk (29,67)
- 9. plass på 60 meter hekk (9,51)
- 15. plass i tresteg (11,43)
- 17. plass på 60 meter (7,79)
- 40. plass på 100 meter (12,71)
- 45. plass i lengde (5,48)

Ikkje mindre enn i seks øvingar er Kristoffer no topp 10 gjennom alle tider for 13-åringar. På 300 meter er han altså heilt på topp. Den gamle aldersrekorden på 300 meter var elles på 41,69, så her var det ei solid forbetring.

Det er naturlegvis lett å hamna i skuggen av Kristoffer, men Kristian Schjønningsen er også inne på Alle Tider-statistikken etter årets sesong:

- 49. plass på 200 meter hekk (31,93)
- 86. plass på 60 meter hekk (10,34)

Historietime: 1978

Retta versjon: Sjølv i USA skjer det at... The Show Must NOT Go on... New York City Marathon, som skulle ha gått av stabelen søndag, er blitt avlyst. Det er første gongen sidan starten i 1970 at det skjer. Det heile er fullt forståeleg. Og det er Sandy som har skulda.

Skulle dette innlegget vore nokolunde elegant, så burde eg kanskje ha sagt noko om 1973. For i 1973 skreiv Bruce Springsteen songen 4th of July Asbury Park (Sandy) og det var no Sandy som var årsaka til så mykje gale på den amerikanske austkysten denne veka. Og boardwalken i Asbury Park - for ikkje å snakka om casinoet - er ikkje i nærleiken av det som det var for berre ei veke sidan. (Eller hausten 2009, då eg gjekk og traska der.)

Men, altså, New York City Marathon: Eg kan ikkje sjølv skryta av anna enn ein bror som har to løp der. Men me kan naturlegvis som nasjon skryta av å ha hatt den største stjerna av dei alle, Grete Waitz. Og i 1978 var Grete Waitz på tur til New York. På kort varsel fann ho ut at ho no kunne prøva seg på denne maraton-distansen, når det først klaffa slik at ho var i byen nett når arrangement fann stad. Ja, så kort varsel var det at ho ikkje var komen på plass i programmet. Dermed sprang Grete Waitz maraton for første gongen... And the rest is history: Grete Waitz vann på 2.32.29 (og komma 8 i tillegg) - ny rekord på den tida. Seinare blei ho kåra til den største kvinnelege løparen i verda for 1978.

I NM blei det tre gull til Grete Waitz i 1978: 1500 meter, 3000 meter og 4km terrengløp. NM-gull blei det også på Heidi Benserud (lengde og femkamp) og Jan Fjærestad (25km landevegsløp og maraton). Jan blei i tillegg verdsmeister dette året - som deltakar på det norske vinnarlaget i stafett i VM i orientering.

Historietime: NM, 1987

I 1986 var det ingen frå BFG-klubbane som tok gull i hovud-NM i friidrett.

Den 28. januar 1987 blei så Friidrettsklubben BFG Fana stifta.

Eg har sagt det før - og eg seier det igjen: i 1987 var eg midt i ein idrettspause, mellom juniorlaget til IL Trio og ein kort periode på A-laget til Søre Neset IL. Eg var eit godt stykke unna BFG-fødselen, sjølv om eg faktisk var godt interessert i både NM og VM i friidrett i det segnomsuste året 1987.

Under NM i friidrett i 1987 på Nesbyen i Hallingdal gjekk det betre - mykje betre. Atle Douglas vann 800 meter på 1:49,37, 23 år gamle Truls Nygaard blei dobbeltmeister, han vann både 5.000 og 10.000 meter (høvesvis 13:45,29 og 28:51,03). Anne-Beth Espetvedt vann 100 meter hekk på 13,71, brukbart det og.

Andre interesssante norgesmeistrar frå 1987: Gisle Ellingsen (Gular, den gongen) i høgde (2,19), Mona Karin Riisnes (også Gular) var på gull-laget i 4 x 100 meter stafett og Siri Bjelland (Eidsvåg) var med på laget som vann gull på 4 x 800 meter.

Eg veit eg burde ha avslutta denne bloggen med ein skikkeleg punchline, noko om at BFG begynte med stil og den slags. Men det er eg rett og slett for trøytt til. Eg slår berre fast at det begynte i 1987. Verkeleg begynte.

Alle Tider, J13, 2012

Bjørnen ligg i sitt lune hi, men det gjer ikkje eg. For i heile sommar har eg ført statistikk for deg og meg.

No ja, poesi til sides: statistikarane er no litt inne i ein dvale nett no, sjølv om eg personleg ikkje heilt har dvalekjensla.

Det er mellomsesong, det er midt mellom utandørssesongen og den innomhus. Det betyr også at me - med ein del smårettingar ut gjennom seinhausten i mente - kan studera årets sesong i lys av ulike dimensjonar. Éin av dei er å plassera inn våre lokale heltar i "Alle Tiders"-statistikken, slik denne bloggen har gjort til vane.

Det er ein varsam start; jenter 13. Dei to einarane frå Gneist i denne klassen, Michelle Floor Heggeland og Nora Øvergaard Aarvik har hatt ein fin sesong. Nora er berre få centimeter i høgde frå å markera seg på den historiske lista over dei beste i landet i årsklassen. Hennar årsresultat her enda på 1,50.

Michelle kan me, med litt godvilje (og det må me jo ha), notera inn på ein 103. plass på 100 meter, med tida 13,47.

Og då var me i gang.

Planane klare på Osterøy

No er det ikkje alle planar som blir følgde når det kjem til stykket. Det gjeld også Osterøy IL sine planar for karusellstemne; nokre justeringar blir det no gjerne når det nye året og den nye våren skikkeleg er på plass.

Likevel; planane for karusell-stemne på Osterøy i 2013 er no klare - sjølv om dei er aldri så førebelse. Det er veldig bra. Andre som arrangerer karusell-stemne held gjerne øvingsprogram tett til brystet til eit par dagar før stemna. Her er det mykje å læra av ostringane.

Det startar på Haus 24. april, med korte distansar (for dei yngste), før det første "skikkelege" karusell-stemnet på Osterøy Stadion i Lonevåg går av stabelen mandag 6. mai. Det er elles rett i forkant av BFG sitt opningsstemne på Fana Stadion, så det er vel mest aktuelt for dei yngste. 21. mai passar gjerne betre?

1. juli og 29. juli er datoane for sommarstemna med løp. 31. juli og 2. august er det planlagt eigne stemne for høvesvis kast og hopp, medan hauststemna er planlagt 26. august og 21. september.

Og alt dette kan me notera oss medan me ventar på skikkeleg stadfesta innomhus-terminliste på Leikvang...

Historietime: Hovud-NM 2003

Hovud-NM i friidrett i 2003 gjekk av stabelen i Fredrikstad. Her blei Merete Knudsen bronsevinnar i spyd for BFG. No var ikkje nivået så veldig dette året, men likevel; ho var tre centimeter bak sølvet og berre litt over 2 meter bak gullet. Ho tok i tillegg 9. plassen i kule.

Benedikte Liland blei nr. 10 i tresteg (her blei ungjenta Margrete Renstrøm nr. 6) og nr. 11 i kule.

Kirsten Melkevik Otterbu tok 5. plassen på 5.000 meter og 6. plassen på 10.000 meter.

Hilde Hovlandsdal hamna på 7. plass i høgde.

Morten Benserud sprang inn til 5. plass i det andre heatet på 400 meter hekk. Han blei jo suveren juniormeister på distansen same året.

Den nye sprint-trenaren i BFG, Johan Sørstrønen, tok ein 5. plass i... spyd! Lengda til Johan var 57,42. Det var eit stykke bak medalje, men han var i godt selskap. Andreas Thorkildsen vann NM-gull og Ronny Nilsen (den noverande sportssjefen) tok sølvet. Ja da, det blei sprint på Johan også; ein fjerdeplass i eine forsøksheatet på 100 meter (11,12).

Den store BFG-stjerna på denne tida var likevel Stine Larsen. Ho tok sølvet på 10.000 meter. Ho var 27 år under NM i Fredrikstad og hadde ei rekkje merittar bak seg alt. Same året vann blei ho nr. 17 i maraton under VM i Paris. I tillegg vann ho Torino maraton.

Tofteåsgubben

Det hender, når me er i vene Sunnhordland, at det blir i meste laget av god mat. Denne helga har ikkje vore noko unntak - med gullbryllaupsfeiring i botnen og gode greier.

Då kjem det greitt med at den eine ungdommen treng følgje på langturen. Me la inn eit par ekstra stigningar, først dei 1200 metrane opp frå Toftevågen opp til Landa, og deretter skogsvegen opp til sjølvsaste Tofteåsen. Seriøse som me er, så blei det ikkje tid til stopp for skriving i boka på toppen, men i staden hardtarbeidande nedoverjogging i snøslapsen.

Vel nede igjen blei det god plass til tre-fire kakestykker til...

Og samtidig, ein annan stad i landet, debuterte eldste ungdommen, Ole Martin, i sjølvaste Svalandsgubben, eit tradisjonsrikt terrengløp i Birkenes kommune i Aust-Agder. Seniorløpet er på heile 27 km og den reelle løyperekord-innehavaren er ein viss Jan Fjærestad (1.43.44 frå 1977). Ole Martin blei nr. 3 i juniorklassen over 15 km i søndagens løp (29 påmelde i klassen), godt bak vinnaren Erik Udø Pedersen og toar Kristian Tjørnhom. Kort rapport så langt: Knalltøft løp, men glitrande trening.

Så får Tofteåsgubben og Svalandsgubben junior snakkast nærmare etter kvart.

Historietime: junior-NM 2003

Ja, det høyrest litt framandt ut i BFG-øyro i desse dagar, men i 2003 var det truleg kastarar det var stilt størst forventningar til før junior-NM i Kristiansand det året. BFG (og Gneist, der dei kvassaste kom ifrå) var verkeleg ein kasteklubb i desse åra.

Steffen Nerdal, som no representerer ein klubb lenger nord i landet, var den store stjerna. I slegge var han uvanleg suveren. Steffen tok gull med over 10 og ein halv meter ned til sølvplassen! I tillegg kom Andreas Eeg på bronse. Om ikkje det var nok; heile tre BFG-utøvarar var med i sleggefinalen i MJ19 - den siste, Håkon Arnesen, tok 10. plassen. Det blei i tillegg gull også i kulestøt til Steffen Nerdal, her var sigersmarginen "berre" 40 centimeter. Og i diskos blei det sølv på kastestjerna i BFG - den gongen.

Suveren var også Morten Benserud i favorittøvinga 400 meter hekk. Han tok gull med om lag eit halvt sekund ned til nr. 2. På kort-hekken - 110m hekk - blei det sølv.

Dei andre medaljane i meisterskapet stod Benedikte Liland (sølv, tresteg), Eirik Karstensen (bronse i høgde, MJ22) og Hilde Hovlandsdal for. Hilde tok bronse i høgde, to centimeter bak vinnaren Stine Kufaas.

Lagserien 2012: Ein første Gneist-prognose

Først av alt - ei repetisjonsøving:

Lagserien er noko som dei færraste tenker på gjennom sesongen. Utanom nokre få stafettøvingar så er friidrett ein individuell idrett. Men på slutten av sesongen blir alle dei individuelle resultata gjort om til lag og til lagserie.

Det inneber at dei ulike klubbane samlar saman resultata, gjer dei om til tyrvinpoeng og sender dei inn til friidrettskretsen. Sånn uti desember - slik til vanleg - blir så årets resultat i sirlige divisjonar presentert.

Kor mange lag ein melder inn i serien avgjer kvar enkelt klubb. Plasseringa i divisjon er - nett som i skikkelege lagidrettar - bestemt av kor ein hamna sist år, med nedrykk og opprykk og greier.

Alt dette blir gjort etter eit opptrukke system. Det vil seia at ein leverer inn eit visst tal resultat i dei ulike øvingsgreinene, alt etter kva for ein divisjon ein høyrer heime i. Det finst ein Elitedivisjon, og det finst 1. - 5. divisjon (i alle fall for gutar) her i Hordaland.

I 2011 var Gneist sine gutar aller best i Hordaland, medan jentene blei nr. 2. Gneist har også stor breidde: For gutar har Gneist eitt elitelag, to lag i 1. divisjon og eitt lag i 3. divisjon. For jenter finst det eitt lag i Eliteserien, to lag i 1. divisjon og eitt lag i 2. divisjon - så her er seks av åtte lag samla i dei to øvste divisjonane.

Som vanleg blir dette presentert i tur og orden når resultata ligg føre i desember månad.

I denne omgang blir det ein isolert prognose, det vil seia ein prognose som er isolert til Gneist sine eigne resultat og som ikkje er knytt til kva andre lag har gjort i år - sjølv om me har ein viss oversikt over det også...

Me får ta gutane først denne gongen, sidan dei var så flinke i fjor:

- Elitelaget ligg etter denne høgst førebelse prognosen om lag 1500 poeng betre til enn i 2011 - og då vann laget. Her finst uhyre sterke resultat og - ja - tipset er enkelt og greitt at fjorårssigeren blir forsvart.

- 2. laget i 1.divisjon rykka ned frå Eliten i fjor - då var det altså to Gneist-lag i Eliten. Kvaliteten på breidden mellom gutane held seg svært god. Tips: 2. laget rykker opp igjen i Eliten, slik at det igjen er to Gneist-lag i Elitedivisjonen i 2013.

- 3. laget i 1. divisjon. Dette laget var heilt oppe på 3. plass i 1. divisjon i fjor. Hald dykk fast; det skal litt til, men det er ikkje utenkeleg at også dette laget er i nærleiken av opprykk. I så fall kan Gneist ha tre lag i Eliten neste sesong. Tipset er likevel at det kjem like bak opprykk (også i år) - uansett uhyre sterkt.

- 4. laget i 3. divisjon blei nr. 5 i 3. divisjon sist år. Prognosen fortel om circa 2500 poeng meir i år for dette laget, og då er også dette laget i nærleiken av opprykk - til 2. divisjon. Her blir det spennande.

Alt i alt fortel dette om ein uhyre sterk Gneist-sesong for gutar, frå topp til breidde og - faktisk! - i alle øvingstypar.

Så, til jentene sine fire lag:

- Elitelaget: Dette laget blei nr. 2 i 2011, etter å ha vunne året før. Førebels prognose fortel at jentene går noko tilbake i poengsum frå i fjor, slik at tipset går ut på ny pall-plass, men ikkje topp-plass.

- 2. laget i 1. divisjon: Dette laget blei sist i Elitedivisjonen i 2011, så her skulle det vera ein potensiell opprykkskandidat. Tipset går ut på at laget ikkje klarer det. Også her er det ein del tilbakegang frå fjoråret. Ein plass - eller to eller tre - bak opprykk.

- 3. laget har også vore i 1. divisjon i år, etter opprykk frå 2. Med andre ord så må målet her vera å halda på plassen i 1. divisjon. Men også dette blir spennande og tipset er i utgangspunktet negativt; at det blir retur til 2. divisjon for 3. laget.

- 4. laget til jentene har vore plassert i 2. divisjon i år, etter opprykk frå 3. divisjon i 2011. Held dette laget seg? Her er eg freista til å vera optimist og seia ja, men også dette blir tett og spennande.

Konklusjonen for jentene er altså noko meir pessimistisk enn for gutane. Ein svært viktig grunn til det er at gutane har svært mange fleire kastresultat enn jentene. Også på hekk/hinder er det uvanleg magert mellom jentene i 2012.