fredag 25. september 2015

Rekordar under radaren

Eg var naturlegvis oppteken av å spela Bruce Springsteen-songar onsdagskvelden, på Sjefens 66-årsdag. 

Andre var opptekne av å smadra rekordar på Fana Stadion: personlege, klubb-, krets og norske rekordar.

Eg forsøker meg på ein oversikt. Her har Herman Ellingsen gått litt under radaren. Eg meiner også han sette ny norsk aldersrekord på 300 meter (i G13), då han sprang på 40,15. 




NASJONALE REKORDAR
-
Herman Ellingsen: 40,15 på 300 meter, G13 (Kristian Tokstad, Lørenskog, 40,36, 2013)
- Pål Haugen Lillefosse: 36,57 på 300 meter, G14 (Kristoffer Blücher, 37,23 frå 2013)

KLUBBREKORDAR:
- Anna Evensen: 30,07 på 200 meter hekk, J15 (Benedikte Liland 30,41 frå 2002)

PERSAR:
- Sondre Rinde: 27,59 på 200 meter hekk (27,83 frå i fjor haust)
- Kristoffer Blücher: 7,31 på 60 meter (utepers, har 7,29 inne)
- Kristoffer Blüicher: 36,49 på 300 meter (37,06 frå i fjor sommar - elles eitt hundredel frå seniorrekorden i Gneist på distansen)
- Gjert Høie Sjursen: 38,79 på 300 meter (debut)
- Jens Larsen Åstveit: 1:57,31 på 800 meter (1:57,9 frå Strandebarm i sommar)

**

Og så har resultatlista frå Sandnes i sist veke kome meg offisielt i hende - og dermed kan me også her konstatera at nr. 8 (!) i Gneist under 2 minutt på 800 meter i 2015 er Espen Roll Karlsen. Espen bevega seg ned til 1:58,95. Det var første gong under 2 i 2015, men det var også ny pers. Den gamle var på 1:59,53, sett på seinhausten i fjor.


torsdag 24. september 2015

Bjarte Eikanger

Me hugsar alle Bjarte Eikanger som ein uhyre sterk løpar, både på bane, gate og i skog og mark - ei god stund gjerne i konkurranse med ungdommane - og gjerne, slik som på biletet, med det resultat at han viste dei yngre ryggen.




Dette er den korte soga om Gamp-en som blei topp-trenar. Bjarte Eikanger har sjølv titulert seg som "Gamp" og gruppa si som Team Gamp, eller deromkring, men siste året har denne omtalen blitt monaleg nedtona. I staden har ei offensiv, målretta satsing prega treningsgruppa til Bjarte. Ja, i tillegg til at det er bygt opp eit svært godt miljø mellom gutane (jada, dei er no gutar, sjølv om dei veks til). Til saman har dette gjort 2015 til eit nesten usannsynleg vellykka år for nett denne gruppa. Når ein god del andre (ikkje alle!) har slite, så har Bjarte si gruppe stått fram og markert Gneist på kartet. Bokstavleg talt. Henrik Irgens Gravdal kvalifiserte seg for og deltok i ungdoms-VM i Colombia. Meisterskap og medaljar både i junior- og ungdomsmeisterskap finst også på lista.

Men først og fremst er det ei betydeleg betring i breidda i toppen, som er lett å legga merke til.

For her har ikkje ein og to, men ein god gjeng kvalifisert seg til hovud-NM, seinast med Jens Larsen Åstveit sitt flotte hinder-løp under UM.

Men så er det altså slik at det for denne typen utøvarar ikkje minst finst to nøkkeldistansar - 800 meter og 1500 meter - der ein gjerne har milepælar for under 2 og under 4 minutt. I fleire år har Gular dominert, med mange utøvarar i desse sub-kategoriane. BFG-miljøet hadde veldig få, om nokon, i mange år.

I 2015 har vinden snudd. På 800 meter har Gneist i skrivande stund åtte utøvarar under 2 minutt! Anders Bjørndal tronar øvst, i røynda saman med nemnde Henrik, på 1:53,84 (og 1:53,94). På 1500 meter er det fem utøvarar som har kome seg under 4 blank, med Henrik øvst på lista, med 3:54,76 frå den nyaste ullevien.

3000 meter er det åtte utøvarar som er under 9 blank, ei anna grense ein har slite med tidlegare - seks av dei frå Team Bjarte.

Det finst mange flinke trenarar. Av og til er det på sin plass med ein ekstra honnør til nokon av dei. I 2015 er det i høg grad rett å gi symbolske blomar til Bjarte - samtidig som eg er overtydd om at her ikkje blir noko kviling på laurbær, verken for utøvarane eller for trenar.

tirsdag 22. september 2015

Lite proft

Idrettslaget Gneist fekk seg altså ein vaskekte junior-norgesmeister i halvmaraton (U23) lørdag. Det var Andreas Iden som klarte den bragden - på strålande 1.11,01 i den indianske sommaren i september-Oslo.


Prestasjonen var svært proff!

Men omtalen av det innlagde norgesmeisterskapet i halvmaraton i årets Oslo maraton har ikkje vore proff eller skikkeleg.

Gneist har ikkje klart det, Kondis har ikkje klart det, Sportsmanden har enno ikkje klart det, Oslo Maraton har ikkje klart det, arrangøren Norges Friidrettsforbund har ikkje klart det. Ingen har så langt klart å gje oss skikkelege lister i dei ulike klassane i NM i halvmaraton!

Sportsmanden.no - som elles har greie reportasjar - er den einaste staden der eg har funne eit bilete av junior-norgesmeister Andreas (over).

Men her er biletteksten:

Harald Solhaug Næss i rød Vidardrakt ble nummer 9 i NM på 1.09.15, mens Kristian Tjørnhom fra Kristiansand Løpeklubb til høyre var en av flere gode løpere som stod av etter passering 10 km. I tillegg til Tjørnhom og Burass, gjaldt dette også Gishe Abdi Wako.

Andreas Iden - norsk meister i U23 - er ikkje nemnt med eit ord, anna enn at han finst i resultatlista, men den er altså ikkje ordna etter klasse, berre etter offisielle tider uansett alder på utøvarane.

Så: Sterk prestasjon av Andreas, uproft av opptil fleire andre.


søndag 20. september 2015

Prestasjonar i Fana

Lørdag var det prestasjonar  Fana (stadion). Søndag var det i Fana, for då handla det om turar (heil-mil og halv-mil) rundt om i Fana-bygda i Fanamilen.

No er det, så langt, berre ved unntakstilfelle at denne bloggen har besøkt løp utanfor bane - enten om dei er i meir eller mindre flate løyper eller oppover fjellsider.

Men no er det naturlegvis mange som har lurt på om bloggarens overgang til Idrettslaget Trio var vellukka, reint sportsleg. Og det kan ein vel ganske klart slå fast at den var. Det blei fanamil-pers med 43 sekund og 2. plass mellom Trio-deltakarane (naturlegvis tre i talet).


Heine Eide Røssland, flanktert av Trio sitt nyaste medlem og ein nøgd bømling frå Hauglandshella.

Og så får Stian Øvergaard Aarvik (med løyperekord på 5 km) og Marius Vedvik (med løyperekord på 10 km) orsaka meg. Den største prestasjonen - men utan noko parkett i premie, berre ein 3-4 bananer - stod Heine Eide Røssland for. Rettnok har Heine trent jamleg i fire år i Gneist, men på løpssida har all trening vore sprint-basert, det same har stemndeltaking vore; 40 meter og 60 meter er han brukande på. Å gå frå 60 meter til 5 kilometer er litt av ein overgang. Men ved frukostbordet søndag blei avgjerda teken; han skulle springa 5 km. Han starta i eit drepande tempo: etter 500 meter hang han over gjerdet og var berre  sliten. Deretter gjennomførte han i intervall-stil; med solide løp og solide (gå-) pausar, før han avslutta med ein skikkeleg spurt siste 30 meter.

Ein stor dag!

lørdag 19. september 2015

Krav og kriterier 2016

Ein førebels oversikt over "Krav og kriterier" til dei internasjonale meisterskapa ligg no føre frå Norges Friidrettsforbund. Detaljar kan lesast HER.

Pr. september i år er det nokre lokale utøvarar som bør blinka seg ut krav og ha til motivasjon gjennom vinteren. Kvalifiseringsperioden startar først ved nyttår.

Eit raskt blikk blinkar ut fire meisterskap som aller mest aktuelle:

* EM for senior i Amsterdam, 6. - 10. juli. Her er det først og fremst håp om at ein skadefri Amund Høie Sjursen kan melda seg på i kampen om plassane på 100 meter. Amund, som har 10,45 frå fjoråret, er berre sju hundredelar frå kravet. Men Norge er no i den gode situasjonen at her er opptil fleire unge sprint-talent som tar mål av seg å klara dette kravet.

* U20-VM i Kazan, Russland, 19. - 24. juli. Her er det utøvarar som er fødde i 1997 og 1998 som kan delta for Norge. På jentesida kan me håpa på at utøvarar som Renate Lie og Eline Myking kan ta steg i 2016-sesongen og melda seg på. Også her er det håp til come back for Anna Serine Røssland, som har pers åtte sekund under kravet på 3000 meter hinder. På gutesida er det ikkje urovekkande langt ned til krava på 800 og 1500 for Henrik Irgens Gravdal, medan 10 000-meter kravet kan vera aktuelt for ein Jens Larsen Åstveit og kan henda Stian Øvergaard Aarvik.

* U18-EM i Tblisi, Georgia, 14. - 17. juli. Her det slik at det er utøvarar fødde i 1999 eller 2000 som kan delta for Norge. Dermed er me i den spesielle situasjonen at Pål Haugen Lillefosse alt no har overhoppa kravet i stav med 23 centimeter, men er fødd eitt år for seint...  På jentesida peikar Ingvild Myking seg ut. Ho har pers som er betre enn kravet på 1500 meter og er heller ikkje langt unna på 3000 meter. I tillegg er Kristoffer Blücher aktuell på eit par distansar, til dømes på 800 meter. Og så kan me ikkje sjå vekk frå mulegheten for at Gjert Høie Sjursen kan tikjempa seg til plass?

* VM i motbakkeløp, Bulgaria, 4. september. Her er Stian Øvergaard Aarvik sjølvskriven.

**

Og så her er rom for overraskingar, naturlegvis! Men me tar berre imot positive overraskingar i 2016.

Føremiddags-prestasjonar

Jo da, eg hadde høyrt ryktene, men eg kvapp litt då eg såg ungdommar i ulike aldrar som sprang seriøse løp på Fana Stadion lørdag føremiddag, då me var på veg til Friske viljer-økt.

Kjekt det. No har eg studert resultatlistene frå dagens overraskingsstemne også. Men før det: Ny svær prestasjon i dette svære året for Andreas Iden. Han persa med godt og vel 4 minutt på halvmaraton og sprang inn på sterke 1.11,01 i Oslos gater. Det inneber at Andreas har krona ein strålande sesong med NM-GULL i halvmaraton for U23!



Så, over til Fana Stadion, der eg startar med André Seliussen. André likar å springa langt. I april sprang han 10 000 meter på Fana Stadion, med innlagt 3000 og 5000 meter. Lørdag knuste han 5000-tida si frå den innlagde bane-mila, og kom i mål på 16:31,14, svært kort bak kravet til neste års junior-NM for André, som enno ikkje har bikka 14 1/2!

5000 meter sprang også Jens Larsen Åstveit. Jens er ein annan som har hatt ein fantastisk 2015-sesong. Dette var likevel første (og siste?) gongen han sprang 5000 denne sesongen og berre andre gongen i banekarrieren. Persen blei på småfine 44 sekunds betring - til 15:19,89.

På 400 meter noterer me tre andre fine persar:

* Henrik Irgens Gravdal med 52,83 (hadde 53,59 frå i fjor)

* Vegard Albrigtsen med 53,55 (33/100 ned frå UM sist helg)

* Thomas Blücher med 57,65 (fin debut)


På 600 meter blei det ny fin pers - og grense-underskriding - frå Hans-Magnus Haukøy. Hans nye bestetid er på 1:29,76.

Til sist to 200 meter hekk-løp, det også kan skrivast heim om:

* Gjert Høie Sjursen kom i sin debut på distansen seg heilt ned på 27,87. Det var like så godt Gjert sin sjuande klubbrekord i G15 denne sesongen. Sondre Rinde hadde den gamle, på 28,08.

* Anna Evensen betra sin pers på distansen frå 31,17 til 30,80.


onsdag 16. september 2015

UM-kvalifiserte 2016

Gneist hadde 13 utøvarar i troppen til UM på Lillestrøm i helga som var - og dei forsynte seg grovt frå premiefatet. 

Sidan det normalt er slik at dei langt fleste er kvalifiserte til komande års meisterskap alt ved slutten av inneverande sesong, så kastar me alt no eit blikk på oversikten over UM-kvalifiserte til neste års UM i Sandnes. Troppen tel alt 23 namn. Og trenden er der framleis, relativt klart: 15 av dei 23 er gutar.

Jens Larsen Åstveit (ein av dei eldste i 2016) og Hans-Magnus Haukøy (UM-debutant i 2016) får stå som representantar.



Her er lista:

J15
- ingen...

J16
Anna Evensen (80m hekk, lengde)

J17
Sanne Myrmel (stav)
Malin Marie Rosvoll Olsen (100m, 200m, lengde)

J18/19
Renate Lie (200m, 400m)
Maren Haugen Lillefosse (lengde)
Elina Drivenes (400m, 800m)
Ingrid Næss Johansen (800m)
Eline Myking (800m)

G15
Andreas Haara Bakketun (100m, 200m, 300m hekk, lengde)
Hans-Magnus Haukøy (800m, 2000m)
Pål Haugen Lillefosse (100m, 200m, 100m hekk, høgde, stav, lengde, tresteg)
Håvard Rinde (300m hekk, kule, diskos, spyd)
André Seliussen (2000m)

G16
Thomas Blücher (800m)
Gjert Høie Sjursen (100m, 200m, lengde)

G17
Kristoffer Blücher (100m, 200m, 400m, 800m, 300m hekk)
Jakob Jamt Ånonli (100m, lengde)

G18/19
Vegard Albrigtsen (800m)
Henrik Irgens Gravdal (800m, 3000m)
Sondre Rinde (110m hekk, lengde, tresteg)
Henrik Almenningen (lengde, tresteg)
Stian Øvergaard Aarvik (800m, 3000m)
Jens Larsen Åstveit (800m, 3000m)

tirsdag 15. september 2015

Sjokkovergang

Hausten er tida for så mykje - epleslang, til dømes, eller nye politiske parti som syslar med sitt. Det er også tida for overgangar. I fotballen har dei hatt eit eige vindauge tidlegare i haust, der dei kan gjera som han svenske 100-åringen, dei kan krypa ut av det. Og inn i eit anna, ein annan stad. No har ikkje fotballen noko nytt slikt vindauge før på nyåret.

Men friidretten... I friidretten startar ståheien på overgangsmarknaden i alle fall når me skriv oktober - og den er ikkje over før nyttårsfyrverkeriet er skikkeleg avslutta.


Men alt no kan me melda om at sjølvaste Bloggaren alt frå komande søndags Fanamilen kjem til å representera det segnomsuste Idrettslaget Trio.

I form av eit aldri så lite skup så har me fått Bloggaren nett så vidt i tale. 48-åringen, som nyleg debuterte på halvmaraton, seier dette berre var ein sjanse han måtte gripa.

"Det er aldri lett å seia når ein tar til å gå i barndommen, men for meg så skjedde det visst no. Og då får ein la vera å kjempa imot." Bloggaren viser her truleg til ein nærare ti år gammal karriere i ulike forsvarsposisjonar i fotballen i Trio, i denne omtalte barndommen. Her var styrkane taklingane, plasseringsevna - og farten. Ja, det er løye å tenka på no at dersom friidretten hadde vore prioritert, så ville sprint og høgde (!) vore øvingane. Truleg. I staden blei det midstoppar og venstreback. Og så halvmaraton og slikt tre tiår seinare.

"Er dette så dramatisk som det kan verka som, Bloggar?"

"Nei, slett ikkje. Eg kjem til å halda hus i den fornemme Søviken og kjem til å følgja med ungdommar som held seg til miljøet rundt Fana Stadion. Men erfaringa tilseier at det kan vera lurt å skilja eigne gampe-ambisjonar frå den skikkelege idretten til dei under 35."

Elles er Gneist og Trio beslekta sjeler. Begge klubbane kom til i den norske idrettens etterkrigs-klondyke: Gneist er 70 i år, Trio er det til neste år.

Så: Heia Trio, heila tio - vel, utanom når eg held med Gneist (og av og til andre).

mandag 14. september 2015

UM - oppsummert

Det nærmar seg slutten på mitt forsøksvis systematiske forhold til Gneist-statistikken på denne bloggen.

Før den tid er det enno litt igjen av denne sesongen. Og aller først må eit sterkt UM oppsummerast.

På førehand sa eg det ville vera optimalt med 18 medaljar, det blei 15, men noko meir enn 5 gull tvilte eg på. Det blei 7. Dei profilane me håpa på skulle bidra til medaljefangsten slo til. I tillegg fekk me hyggelege overraskande bidrag.

På den nasjonale medaljestatistikken fall Gneist ned på 4. plass - etter 1. i 2013 og 2. i 2014, men er framleis beste klubb frå Hordaland - nett så vidt føre Norna-Salhus - og med Fana ikkje langt bak der igjen.



Først medaljane:

GULL
- Kristoffer Blücher, 300 meter hekk (41,31)
- Kristoffer Blücher, 800 meter (1:57,29)
- Henrik Irgens Gravdal, 3000 meter (8:40,12)
- Henrik Irgens Gravdal, 800 meter (1:56,96)
- Gjert Høie Sjursen, 100 meter hekk (13,66)
- Gjert Høie Sjursen, lengde (6,26)
- Jens Larsen Åstveit, 2000 meter hinder (6:09,92)

SØLV
- Sanne Myrmel, stav (2,71
- Kristoffer Blücher, 100 meter (11,28)
- Sondre Rinde, 110 meter hekk (15,24)
- Sondre Rinde, 300 meter hekk (41,90)
- Jens Larsen Åstveit, 3000 meter (8:43,62)
- Anna Evensen, 80 meter hekk (12,30)

BRONSE
- Gjert Høie Sjursen, diskos (39,94)
- Gjert Høie Sjursen, kule (13,18)

*

Så litt meir om nokre av prestasjonane:

- Både Henrik Irgens Gravdal og Kristoffer Blücher tok trippel - tredje siger på rad på distansen - då dei vann kvar sine 800 meterar.

- I tillegg til gull blei det ein strålande debut på 2000 meter hinder for Jens Larsen Åstveit. Med 6:09,92 sneik han seg sju hundredelar under kravet til hovud-NM! Også på 3000 meter blei det ein flott prestasjon, med ny pers med 5 (vel, 5,01) sekund - til 8:43,62.

- Kristoffer Blücher tok nesten sitt tredje gull, på 100 meter, men var der eitt hundredel bak vinnaren. Men det blei pers, 11,28, betring med ni hundredelar frå Tyrvinglekene - og betring av eigen klubbrekord i G16.

- Sondre Rinde tok eit fint sølv på 110 meter hekk (91,4) men med 15,24 slo han også Marius Benserud sin ni år gamle klubbrekord på distansen i G17 - med tre hundredelar.

- Thomas Blücher persa solid på 800 meter - frå 2:06,56 (Göteborg i år) til 2:03,73.

- Gjert Høie Sjursen betra lengdepersen - då han vann gull - med to centimeter, til 6,26. I den andre gull-øvinga, 100 meter hekk, blei det betring frå 13,77 til 13,66. Begge deler er elles klubbrekord i G15.

- Malin Marie Rosvoll Olsen sette to nye fine persar. I lengde er det no blitt svært brukbare 5,01 (hadde 4,65) og på 100 meter blei det 13,14 - og dermed under kravet til junior-NM på distansen.

- Stian Øvergaard Aarvik blei endå ein i rekkja som kom seg under 2 minutt på 800 meter, då han søndag sprang på 1:59,58. Det er 3,7 sekund betre enn den gamle utepersen - han har 2:01 innomhus. Stian sette også solid ny utepers på 3000 meter - til 8:47,99 (her hadde han 8:55 frå før, men han har 8:42 inne).

- Vegard Albrigtsen kom seg også under 2 blank på 800 meter! Der blei det 1:59,73. I tillegg betra han 400-persen med sju hundredelar - til 53,88.

- Og Ingrid Næss Johansen sprang sin beste 3000 meter på nesten to og eit halvt år, då ho kom i mål på 10:49,93 fredagskvelden. Det er under sekundet bak persen frå Framolekene våren 2013.

- Laget i G15/17 på 1000 meter stafett var tett bak U20-rekorden i Gneist, med sitt løp på 2:02,87. Det blir notert som aldersbestemt rekord under G17, sidan eldstemann var i denne klassen: Sondre Rinde, Gjert Høie Sjursen, Kristoffer Blücher og Henrik Irgens Gravdal.

torsdag 10. september 2015

Før UM - IV

Det er tre utøvarar og tre øvingar - individuelt - igjen på mi liste, i førehandsgjennomgangen til helgas UM. Det er tre gutar i klasse 18/19.


Først til 800 meter, der alle tre er med: Jens Larsen Åstveit er rangert heilt oppe på 7. plass mellom så mange som 37 påmelde totalt. Dei to andre, Stian Øvergaard Aarvik og Stian Norheim får ta 800-meteren som dessert søndag. Førehandstipset tyder på tredobbelt til Ullensaker/Kisa: Markus Einan og tvillingane Sigurd og Sverre Blom Breivik har sprunge fort i år.

Lørdag er det 2000 meter hinder, der Gneist har to av dei sju påmelde. Her er det alltid litt spennande kven som faktisk stiller. Både Jens og Stian N. er i utfordrarposisjon til medalje, avhengig av dette. I utgangspunktet er det Vicent Sondre Førde (Gloppen), Lars Lunde (Stord) og Joakim Sødal (Kyrksæterøra) som verkar sterkast - om ikkje nødvendigvis i den rekkefølgja.

Alt i morgon, fredag, er det 3000 meter, der også alle våre tre i eldste klasse er påmeldt. Både Stian Ø. Aa. og Jens er så sterke løparar at dei kan vera mellom dei beste her, litt avhengig av korleis løpet går. Etter tider på førehand blir Stian Ø. Aa. rangert som nr. 6, Jens som nr. 9 og Stian N. som nr. 14. Joakim Sødal og Lars Lunde må her bryna seg på Sigurd Ruud Skjeseth (Orion), i tillegg til fleire andre sterke namn.

**

Også på stafettsida er det gutane som representerer først og fremst dette året. To lag har vore påmeldt. Det er vanskeleg å sjå at det er grunnlag for lag i yngste klasse (15/16), medan det er muleg å stilla mellom dei heile 18 laga som er påmeldt i eldste klasse (17-19). Her er det heilt uråd å seia noko fornuftig på førehand; kva for lag stiller til slutt, og kven orkar å springa søndag ettermiddag, etter harde individuelle løp, osb.

**

Heilt til slutt: Gneist vann medlajestatistikken på Lillehammer i 2013 og blei nr. 2 i Haugesund i fjor. Då blei de 18 medaljar, 8 i gull og 5 i kvar av dei to andre valørane. Det blir ikkje same fangsten i år. Til det er troppen for smålåten i storleik. Det ligg stor bør på nokre enkeltutøvarar. Er desse i form, friske og skadefri, så kan det bli tosifra tal på medaljar i år også. Førehandsrangeringa tilseier 5 gull, 5 sølv og 3 bronse. I så fall vil utteljinga vera tett opp mot det optimale.

onsdag 9. september 2015

Før UM - III

Dagens før-UM- innlegg omhandlar 1 stk 16-åring og tre 17-åringar, og då er det rimeleg å ta 16-åringen først - Kristoffer Blücher.



Kristoffer er altså einaste representanten i G16, og han er påmeldt i tre øvingar. Til gjengjeld er Kristoffer pall-kandidat i alle tre:

100 meter er det heile 30 utøvarar påmeldt i G16. Favoritten heiter Morten Endresen og er frå Haugesund, men nest-beste tida på førehand er det Kristoffer som har. Deretter er Fredrik Øvereng frå Overhalla rangert.

800 meter er det grunn til å forventa rivande oppgjer mellom Kristian Skage Nordlund (Trones), Didrik Hexeberg Warlo (Tyrving) og Kristoffer - på førehand i den rekkefølgja, etterpå vonleg i motsett.

Rangert på førehand er altså Kristoffer sølv- og bronse-kandidat på desse to første øvingane. På 300 meter hekk er han gull-favoritt, framfor Syver Røinaas (Tyrving) og Øystein Steinsvik Evjen (Sortland).

Så bevegar me oss over til G17 - der Gneist stiller med tre utøvarar.

400 meter er Vegard Albrigtsen representanten. Vegard sprang på 53,95 i fjor, men har ikkje 400-tid så langt i år. Startfeltet tel 22 mann og det er ikkje venta at Vegard kjem til å prega toppen på denne distansen. Her er det Muhammed Doodu Jatta (Tjalve), Erik Solbakken Ring (Gausdal) og Daniel Nikolai Pedersen (Skjalg) som har best tider i år.

800-meteren i G17 har ein soleklar Gneist-favoritt i Henrik Irgens Gravdal. Han har klart best tid i år av dei 21 påmelde. Klar utfordrar, som ikkje har tid på distansen i år, er Thomas Byrkjeland (Tjalve), deretter kjem Ola Kroken (Vidar). Her er Vegard Albrigtsen heilt oppe som 7. rangert på førehand.

3000 meter er venta å bli eit nytt bikkjeslagsmål mellom dei to Colombia-fararane frå i sommar, Henrik og Thomas Byrkjeland. Harald Østberg Amundsen (Tyrving) har 3. best tid, eit stykke bak dei to klare favorittane. 17 utøvarar er påmeldt den lengste distansen i klassen.

Til sist til Sondre Rinde sine tre øvingar. Sondre har arbeidd seg tilbake gjennom denne sesongen og kan enda opp med ei fin UM-avslutning. På 110 meter hekk er det berre fire påmelde deltakarar. Multitalent og mangekjempar Toralv Opsal (Ålesund) er favoritt, framfor Sondre og Vegard Hope Bjørge (Hellas). På langhekken over 300 meter er det nokre fleire, med 7 påmelde. Medaljefavorittane er dei same - i same rekkefølgja: Opsal, Sondre og Bjørge.

Til sist er Sondre også påmeldt i lengde, saman med åtte andre. Her er han i utfordrarposisjon, som 5. best rangerte på førehand. Toralv Opsal er igjen favoritt, framfor Henrik Skulevold (Sandnes) og Mathias Wester (Overhalla).

tirsdag 8. september 2015

Før UM - II

Dagens førehandsbolk til helgas UM tar for seg éin klasse og to utøvarar: G15 og Gjert Høie Sjursen og Thomas Blücher.



Surprise, surprise: Dei to får ikkje selskap av kvarandre på nokon av øvingane.

Først til Gjert Høie Sjursen sine påmelde øvingar:

Og ungdomsmeisteren i mangekamp frå Nittedal i vår, han er medaljekandidat - og vel så det - i det han stiller opp i.

100 meter er det 24 påmelde utøvarar. Filip Bøe frå Fana er grei favoritt, men bak der er Tinius Fremstad-Waldron (BUL) og Gjert rangert. Men på 100 meter hekk er Gjert rimeleg klar favoritt mellom dei 10 påmelde, med Sebastian Marrot (Bækkelaget) og Viljar Gjerde (Norna-Salhus) med nærmaste tider på førehand. Gjert må tåla favorittstempelet også i lengde. Også der er Viljar Gjerde medaljekandidat. Eirik Mannsverk (BUL-Tromsø) eir ein annan som kan hoppa langt. Her er 14 påmelde.

Så er mangekjempar Gjert påmeldt i to kast-øvingar: Kulestøt er den einaste øvinga der Gjert ikkje nr.1 eller topp 3 på førehand. Til gjengjeld er han 4. rangert, så langt unna er det ikkje her heller. Fana-kompis Erlend Bolstad Raa har støtt lengst i år, framfor Simen Sebstian Hansen (Ås) og David Vorren (Vadsø). Men i den andre kastøvinga til Gjert, diskos, er han igjen etter måten klart lengst så langt i år, med nemnde Simen Sebastian Hansen nærmast og Sander Mikkelsen (Eidanger) deretter.  Altså: Gjert er gull-favoritt i tre øvingar og medalje-kandidat i to...

Så til den andre debutanten i denne forma for UM, Thomas Blücher. Thomas er medlem av den framgangsrike gjengen til Bjarte Eikanger, noko som betyr at han er påmeldt dei tre lengste distansen i G15: 800 meter, 1500 meter hinder og 2000 meter.

800 meter er det tre klare medaljekandidatar i Jakob Ingebrigtsen (Sandnes), Petter Myhr (Orion) og Martin Berntzen Engevik (Nittedal), men Thomas er så høgt rangert som nr. 7 av dei 31 påmelde.

1500 meter hinder skal vera noko heilt nytt for Thomas. Det er han aldri åleine om når det kjem til UM. Difor er det vanskeleg å spå godt, men eg reknar med at to av dei nemnde, Jakob Ingebrigtsen og Petter Myhr, vil vera heilt der oppe. Thomas kan vera medaljeutfordrar. 9 utøvarar er påmeldt.

Så til 2000 meter, denne spesielle 15 års-øvinga i norsk samanheng. Sjølv om kvalifiseringskravet blei littegrann strama inn for eit par sesongar sidan, så er det rimeleg liberalt framleis. Heile 28 utøvarar er påmeldt. Rangeringa her minnar ein del om 800 meter, med Jakob Ingebrigtsen, Petter Myhr og Martin Berntzen Engevik som dei på papiret sterkaste. Thomas er 11. rangert på førehand.


mandag 7. september 2015

Før UM - I

Til helga er det aldersbestemt nasjonalt meisterskap - eller "ungdomsmeisterskap", UM - på Lillestrøm. Gneist sin tropp er på smålåtne 13 utøvarar. Me har vore bortskjemde med det doble og vel så det dei siste par åra. Me får håpa på at 2015 er det store unntaksåret. Eg veit i alle fall at det står ein bøling og ventar på at 2016 skal bli betre, både av slike som av ymse grunnar er ute av spel denne gongen, sjølv om dei har UM-alderen, og dei som står og trippar og ventar på å bli gamle nok.




Og det er hos jentene, som nemnt tidlegare, det er tynnast. Dagens førehands-innlegg før UM handlar då om alle startane frå Gneist-jenter i årets UM.

J15
Her heiter Gneist-representanten Anna Evensen. Anna meisterskapsdebuterte med bronse på 60 meter hekk på Ulsteinvik i mars. Det skal godt gjerast om ho klarer å følgja opp dette i UM, på 80 meter hekk, men ho er trass alt 4. rangert, sjølv om dei tre øvst rangerte er etter måten klare medaljekandidatar: Emma de Haas (Sturla), Emilie Sandberg (Sandnes) og Sigrid Kleive (Ålesund). Det er 12 utøvarar påmeldt øvinga. Heller ikkje i lengde er Anna så langt unna medalje i førehandsrangeringa, med sin årsbeste på 5 meter. Ho er 5. rangert mellom dei 16 på startlista. Sigrid Kleive, Emilie Sandberg og Elin Serine Vik Johannessen (Lyngdal) er dei tre på startlista med lengst lengder i år.

J16
I klassen over, J16, doblar Gneist til 2 utøvarar: Malin Marie Rosvoll Olsen er påmeldt i tre øvingar: 100 meter, 200 meter og i lengde. Det er høvesvis 36, 35 og 26 påmelde i dei tre øvingane og Malin er rangert noko bak midten i dei. På 100 meter heiter favorittane Ingvild Meinseth (Sørild), Live Haugstad Hilton (Bergens TF) og Tonje Fjellet Kristiansen (Orion). Malin har 13,25 frå tidlegare. På 200 meter er det Tonje Fjellet Kristiansen, Live Haugstad Hilton og Karoline Daland (Sørild) som har best tider på førehand, Malin har 27,45. I lengde har Malin hoppa 4,65 i år, medan Thale Leirfall Bremset (Stjørdal), Live Haugstad Hilton og Ingvild Meinseth er dei som har best lengder.

I stavsprang i denne klassen er det duka for første medalje. Her har nemleg Sanne Myrmel nest-beste utgangspunkt av dei tre påmelde, nokså klart bak favoritten Birgitte Kjuus (Raumnes & Årnes) og nokså greitt framfor den tredje, Tina Tunes (Fri), også ho i Team Paavo.

J18/19
Det er altså ingen deltakarar i J17 - og det er berre éi i eldste klasse, J18/19 - Ingrid Næss Johansen. Ingrid har slite lenge i motgang, men i år har ho levert fleire gode motbakkeløp og under Bergenslekene nyleg fekk ho to habile tider, på høvesvis 800 meter og 2000 meter. På 800 meter er det 19 påmeldt. Med fleire openbare topp-kandidatar borte frå listene, så er det ganske ope: Emily Rose Norum (Steinkjer), Amalie Sæten (Kristiansand) og Caroline Fleischer (Ski) peikar seg ut. På 3000 meter er det 16 påmelde. Her er Ingrid 12. rangert på førehand. Ei anna Ingrid, Ingrid Halvorsen Folvik (Bergens TF), er klar favoritt, medan Emilie Fossumstuen Grøterud (Moelven) og Mariann Roe (Skarphedin) er mellom fleire medaljekandidatar.

søndag 6. september 2015

Fem om dagen - kretsleikane dag 2

Jada, det var færre Gneist-deltakarar under kretsleikane for 13- og 14- åringar i år enn det me har vore vane med. Og ja, det er absolutt ei utfordring å halda trøkket oppe i dei yngre årsklassane. Men la oss heidra dei som var med og prega øvingane og med på å sikra Hordaland ein ny siger - i kampen mot Rogaland, Sogn og Fjordane og Agder-fylka.

Det blei fem sigrar søndagen:


Herman Ellingsen var einaste Gneist-ar i G13, men han leverte sterke saker. På 60 meter vann han med 7,96 og på 200 meter hekk kom han heilt ned på 29,93!

To sigrar blei det også på Pål Haugen Lillefosse i G14. I høgde blei det ny pers på 1,70, og dermed sletta han Torstein Onarheim sin klubbrekord i G14, sett tilbake i 1998. Pål sprang på svært sterke 7,35 i finalen på 60 meter, berre fire hundredelar bak klubb-kompis Andreas Haara Bakketun sin norske aldersrekord (elektronisk). Andreas sjølv vann suverent 200 meter hekk, med 27,42 - to sekund framfor nr. 2.

**

Så er det viktig å notera fin innsats frå Nora Helene Kjerland Kristensen, som har hatt sitt gjennombrot i år, på favorittøvinga 600 meter. Søndag blei det 14. plass på 60 meter. Nora var altså einaste jenta frå Gneist i årets kretsleikar.

lørdag 5. september 2015

Gnistrande første dag av kretsleikane

Pål Haugen Lillefosse har sett så mange rekordar i 2015 at eg har mista oversikten. Målet er å finna den igjen ein eller annan stad, i ein krik eller i ein krok. Lørdag fekk han endå ein. Då hoppa han 4,52 i stav, noko som er ny stemnerekord i kretsleikane for 14-åringane med så mykje som 1 meter og 10 centimeter!


Pål vann også si andre øving lørdag, på 80 meter hekk.

Herman Ellingsen vann 600 meter i G13. Han blei i tillegg nr. 2 på 60 meter hekk.

2. plass blei det også på Andreas Haara Bakketun i G14 på 200 meter. Same plassering blei det på Hans-Magnus Haukøy på 600 meter. Hans-Magnus slo dessutan til med ny pers på distansen, med 1:31,43, like under det han sprang på nyleg under Gneistspelen.

Så kompletterer me med plasseringane til einaste Gneist-jenta på Osterøy denne helga: Nora Helene Kjerland Kristensen, som blei nr. 7 på 600 meter og nr. 14 på 200 meter.

fredag 4. september 2015

Banditt-leikane

Osterøy arrangerer nok ein gong kretsleikane for 13- og 14- åringane denne helga. Det er imponerande - og me slenger av oss capsane for det.



Kretsleikane skiftar oftare og oftare sponsornamn, så her er det berre å følgja med. For oss som hadde undgommar i denne alderen for 5-7 år sidan, så vil dei heita "NCC-leikane" på ubestemt tid...

No ja.

Hordaland sin tropp fortel oss at Fana gjer veldig mykje rett i yngre klassar og i sin rekrutteringspolitikk. I 2014 var Fana klart største klubb i Hordaland sin tropp, med 12 utøvarar. I år er Fana sin gjeng auka til 13. Det er imponerande. Sjølv i Gneist sine topp-år sleit ein med å nå slike mengder.

Bergens Turnforening har nest flest med, med 7, medan Gneist først følgjer deretter med 6 utøvarar. Så mange som 4 av dei 6 Gneist-utøvarane er i G14-klassen.

Oversikten nedanfor viser utviklinga i Gneist-deltaking i kretsleikane sidan 2011. Dei tre første åra viser stor stabilitet og ei jamn fordeling i årsklassasne. Dei to siste åra er nedgangen klar, samtidig som dei også fortel om at heile årsklassar heilt manglar Gneist-deltaking.

 Gneist-deltakarar i Hordaland sin tropp til kretsleikane for 13- og 14-åringar, 2011-2015


2011
2012
2013
2014
2015
J13
3
2
3
0
1
J14
3
3
2
2
0
G13
3
3
3
5
1
G14
2
3
2
1
4
Totalt
11
11
10
8
6



**

Dei som faktisk deltar i helga, skal me naturlegvis følgja med på!

Det er:

J13
- Nora Helene Kjerland Kristensen (60m, 200m, 600m)

J14
- ingen

G13
- Herman Ellingsen (60m, 200m, 60m hekk, 200m hekk)

G14
- Andreas Haara Bakketun (60m, 200m, 200m hekk, lengde)
- Pål Haugen Lillefosse (60m, 80m hekk, høgde, stav)
- Hans-Magnus Haukøy (600m, 1500m)
- André Seliussen (600m, 1500m)

tirsdag 1. september 2015

Større friidrettsfamilie

Bloggen har årvisst studert medaljeoversikten frå KM 11-14 år. Det er interessant å sjå kva for klubbar som best klarer å ta vare på underveksten, og dette er i alle fall eitt mål for den.



Eitt poeng etter årets KM (som altså blei skipa til i juni) er at det er fleire klubbar som markerer seg i medaljefangsten. Heile 15 klubbar fekk med seg gullmedaljar. I tillegg er det fleire som plukkar mange gull. Dette er svært positivt. Me noterer heile 6 gull på Skogsvåg, til dømes. Neste års NM-arrangør, Ask, legg me merke til igjen er høgt oppe. Dei har auka frå 12 til 14 gull. AKS-77 fekk 12 gull, mot 8 i fjor.

Dette igjen inneber at Gneist og Fana, som dominerte i fjor, har langt færre gull, sjølv om dei to framleis toppar statistikken. Gneist er knepent framfor Fana dette året:


Gull
Sølv
Bronse
Gneist
16
19
11
Fana
15
26
23
Ask
14
5
8
Bergens TF
12
9
10
AKS-77
12
8
6
Norna-Salhus
9
2
1
Skogsvåg
6
4
2
Viking
5
6
5
Osterøy
3
5
2
Laksevåg
3
3
6
Voss
3
2
1
Bjarg
3
1
3
Fri
2
5
2
Bremnes
2
2
1
Sædalen
2
0
1
Strandebarm
0
0
1

Gneist var nede frå topp-plassen i 2013, då Fana toppa. Elles har Gneist vore topp-klubb i denne oversikten sidan 2009. Samtidig var medaljefangsten ein heilt annan i åra 2009-2012 og i 2014 enn den var det i 2015. For tredje året på rad er det Fana som har plukka (klart) flest medaljar: 64 for Fana, mot 46 for Gneist. Gneist har med andre ord ein del toppar, men manglar den store breidda som til dømes Fana no har.

Fana tok til å bli ein toppklubb i 11-14 år frå 2011, etter ei systematisk satsing. Her er styrkeforholdet mellom Gneist og Fana 2008-2015:

Tala: Totalt (gull-sølv-bronse)



GNEIST
FANA
(differanse)
2008
37 (13-14-10)
24 (6-13-5)
G-13 (7-1-5)
2009
78 (30-26-22)
21 (7-7-7)
G-57 (23-19-15)
2010
73 (32-25-16)
26 (7-8-11)
G-47 (25-17-5)
2011
88 (40-28-20)
41 (15-15-11)
G-47 (25-13-9)
2012
65 (41-15-9)
33 (9-14-10)
G-32 (32-1-f1)
2013
31 (16-10-5)
53 (22-17-14)
F-22 (6-7-9)
2014
54 (30-15-9)
65 (23-17-25)
F-11 (g7-2-16)
2015
46 (16-19-11)
64 (15-26-23)
F-18 (g1-7-12)


Gneist sin trend i tal på totale medaljar er klart på veg ned. Det er ei generell utfordring med at færre og færre konkurrerer i dei yngste klassane. Delvis er det lett å la seg blenda av god kvalitet i 15+, delvis er det fleire solide toppar i nokre av dei yngre klassane framleis, men totalbiletet er likevel eintydig.